Балкан

Аларм за бомби го парализира железничкиот сообраќај во Србија

Целиот патнички железнички сообраќај во Србија денеска е суспендиран откако „Србијавоз“ добил анонимна дојава за поставени експлозивни направи на сите возови и пруги. Компанијата соопшти дека мерката ќе остане во сила сè додека надлежните институции не спроведат целосни безбедносни проверки.

„Сообраќајот на сите патнички возови е суспендиран до понатамошно известување“, соопштија од „Србијавоз“, потенцирајќи дека алармантната дојава се однесува на сите правци и линии во државата.

Инцидентот се случува во ек на зголемени политички тензии, само ден пред најавениот голем граѓански протест на 28 јуни, организиран од студентските движења кои веќе со денови ја блокираат Универзитетската улица во Белград. Протестот е најавен како масовен одговор на трагедијата во Нови Сад, каде при уривање на настрешница загинаа 16 лица. Студентите и граѓански активисти бараат оставки, предвремени парламентарни избори и правна одговорност за случајот.

Во меѓувреме, српските власти започнаа со низа апсења низ државата. Досега се уапсени седум лица во две одделни полициски акции. Меѓу нив е и студент од Универзитетот во Белград, обвинет за „повикување на насилна промена на уставниот поредок“, додека останатите се товарат за обид за „насилно рушење на власта“.

Опозициски партии и граѓански организации предупредуваат дека режимот се обидува да создаде клима на страв пред протестот, обвинувајќи ја власта за политички прогон и злоупотреба на безбедносните служби. Надлежните институции најавуваат нови апсења, а Србија се соочува со најинтензивниот политички и безбедносен предизвик ова лето.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.