Окружниот суд во Ерусалим денеска го одби барањето на израелскиот премиер Бенјамин Нетанјаху за одложување на неговото сведочење во тековното судење за корупција. Одлуката доаѓа откако американскиот претседател Доналд Трамп изјави дека случајот против Нетанјаху треба целосно да биде отфрлен.
Во соопштението објавено на интернет, судот истакнува дека „во својата сегашна форма, барањето не содржи правна основа ниту пак доволно аргументи за одложување на рочиштето“, пренесе агенцијата AFP.
Нетанјаху, кој се соочува со неколку обвиненија за корупција, измама и злоупотреба на довербата, и натаму тврди дека е жртва на политички мотивиран прогон. Судењето трае од 2020 година и се однесува на три одвоени случаи во кои се тврди дека премиерот примал подароци и користел своја политичка позиција за лична корист.
И покрај неговите обиди да го одложи процесот, судот нагласува дека нема да има промени во утврдената динамика на постапката. Рочиштата ќе продолжат согласно веќе утврдениот распоред.
