Македонија

Силен пораст на странски туристи во Македонија – над 21% повеќе во првата половина од 2025

Македонија бележи значаен раст на странски туристи – дури 21,6% повеќе во првите шест месеци од 2025 година во споредба со истиот период лани, покажуваат најновите податоци од Министерството за култура и туризам. Доколку ваквиот тренд продолжи, до крајот на годината се очекуваат околу 1,5 милиони странски посетители, со проектирани приходи до 500 милиони евра.

Од Министерството велат дека зголемениот интерес се должи на засилената меѓународна промоција, инвестициите во туристичка инфраструктура и уникатната понуда која го истакнува македонското културно и природно наследство, како и гастрономијата. Растот се бележи и надвор од главната туристичка сезона, што укажува на успешна диверзификација на понудата.

Најмногу туристи пристигнуваат од Турција, Србија, Германија, Грција и Хрватска, а стабилен интерес има и од САД, Холандија и Италија.

Системски реформи за ефикасен туризам

Во насока на подобрување на координацијата и управувањето со туризмот, Владата иницира институционални реформи. Со законски измени доставени до Собранието, се предвидува укинување на Агенцијата за промоција и поддршка на туризмот, основана во 2013 година. Нејзините надлежности ќе преминат во рамките на Министерството за култура и туризам, со цел централизирана и поефикасна промоција.

Министерството ќе го преземе целиот кадар, архиви и надлежности, ќе раководи со субвенции за организиран странски туризам, и ќе формира Совет за туристичка промоција. Одлуката следи по наоди од државната ревизија, која укажа на сериозни слабости во досегашното работење на Агенцијата.

Надлежните уверуваат дека земјава е на добар пат да се позиционира како водечка туристичка дестинација во регионот, со зголемена конкурентност и подобра искористеност на ресурсите.

Македонија

ВЛЕН: По 24 години конечно закон за правично застепеност

Коалицијата ВЛЕН го поздравува позитивното мислење на Комисијата на Венеција за Законот за правично и соодветно застапување, кој беше претставен од заменик-премиерот Арбен Фетаи, со што се дава зелено светло за процесот што ја затвора 24-годишната чекање.

Овој закон е доказ дека кога постои политичка волја, принципот на правично застапување не останува само на зборови, туку се претвора во закон. Правичното застапување се движи напред, базирано на европски стандарди и принципот на меритократија.

ВЛЕН е решен ова прашање да не остане повеќе предмет на политички игри, туку да добие целосно законско решение, за професионална, функционална и инклузивна јавна администрација за сите заедници.

За 24 години ова прашање се користеше за реторика и политички калкулации, без да се постигне законско решение. Денес, ВЛЕН го затвора овој период, претворајќи го правичното застапување во закон.

Македонија

Седум од десет Македонци против покачување на платите на судиите и обвинителите

Според последното истражување на јавното мислење на порталот МКД.мк, спроведено од агенцијата Маркет Вижн, македонските граѓани се изразито против покачување на платите на судиите и јавните обвинители.

Одговорите покажуваат дека 73,6 отсто од испитаниците сметаат дека судиите и обвинителите не заслужуваат зголемување на нивните месечни примања, додека само 14,8 отсто сметаат дека повисоките плати се оправдани. Најголем дел од граѓаните оценуваат дека покачувањето на платите нема да придонесе за подобрување на состојбата во македонското правосудство.

Истражувањето било спроведено од 25 ноември до 6 декември 2025 година со CAТI метод – телефонско анкетирање со помош на компјутер, на примерок од 1.200 испитаници.

Резултатите ја потврдуваат недовербата на граѓаните кон правосудниот систем и укажуваат на потребата од реформи и зголемена одговорност во судството.

Македонија

Детонации на Криволак: се уништуваат експлозиви запленети пред 15 години

Полициски службеници од Одделот за криминалистичка полиција – Единица за недозволена трговија со оружје, опасни материи и радиоактивен материјал, во координација со Единицата за откривање и демонтирање на експлозивни средства при Одделот за сузбивање на организиран и сериозен криминал, согласно однапред изготвен план, преземаат мерки и активности за уништување на голема количина минско-експлозивни средства.

Минско-експлозивните средства, кои биле запленети пред цели 15 години и складирани во касарната „Ѓорче Петров“, денеска се транспортираат до армискиот полигон „Криволак“ со товарни возила на АРМ. Уништувањето ќе се спроведе во присуство на Комисијата за уништување на оружје, делови и компоненти на оружје, муниција и експлозивен материјал.

Процесот на уништување ќе го реализираат полициски службеници од Единицата за откривање и демонтирање на експлозивни средства и направи, стручни лица од Армијата на Република Северна Македонија и пиротехничари од Дирекцијата за заштита и спасување, преку контролирана детонација.

Фактот што станува збор за прво уништување на ваков тип минско-експлозивни средства по цели 15 години укажува дека безбедносните ризици во минатото не биле третирани со потребната сериозност. Денешната активност претставува јасен сигнал дека со одговорен пристап, зголемена посветеност и професионално раководење, безбедноста на граѓаните конечно се става на ниво кое одамна било неопходно.