Министерот за дигитална трансформација, Стефан Андоновски, изјави дека Македонија е технички подготвена за спроведување на дигитален попис во 2026 година. Во интервју за Сител, тој нагласи дека овој процес е веќе вклучен во програмата на Владата и оти подготвителните активности се веќе во тек.
„Целта е да ја вратиме довербата на граѓаните во системот. Ако ги подготвиме сите услови, дигиталниот попис може да се одржи во 2026 година, наместо во редовниот термин во 2031“, изјави Андоновски, посочувајќи ја Словенија како пример за успешно дигитализирано попишување.
Андоновски истакна дека Владата веќе во април формирала работна група задолжена да ги дефинира предусловите за дигитален попис. Приоритет, како што рече, ќе биде прочистувањето на базите на податоци од различни институции за да се обезбеди точност и ефикасност на пописниот процес.
Дигиталната лична карта и возачка дозвола – достапни од октомври
Најавен е и значаен дигитален напредок: на Самитот за дигитализација на Западен Балкан, кој ќе се одржи на 1 и 2 октомври во Скопје, ќе биде презентирана македонската апликација за дигитална лична карта и возачка дозвола. Од тој ден, граѓаните ќе можат да ја преземат апликацијата во тест-верзија.
„Ова е само почетокот на новата ера во дигиталните услуги“, изјави Андоновски, додавајќи дека платформата uslugi.gov.mk постојано се унапредува, а бројот на корисници веќе достигнал над 6.300. Посебно задоволство, рече министерот, претставува тоа што и институциите, вклучувајќи ги и судовите, веќе активно ги користат електронските потврди, како на пример потврдата за неосудуваност.
Во таа насока, најавено е укинување на дотурата за вадење изводи преку е-услугата на Управата за водење матични книги – во иднина, изводите ќе бидат достапни исклучиво преку порталот uslugi.gov.mk. За поголема транспарентност и интеракција со граѓаните, ќе биде воведена и услугата „Електронско сандаче“, каде корисниците ќе добиваат известувања и информации директно на својата дигитална адреса.
Собранието ги изгласа клучните закони за дигитална трансформација
На 58. седница, Собранието ги усвои четирите столба на дигиталната реформа:
Законот за електронски комуникации
Законот за безбедност на мрежни и информациски системи
Измените на Законот за електронски документи, електронска идентификација и доверливи услуги
Законот за архивски материјал и архивска дејност
„Станува збор за комплетен и усогласен сет на законски решенија со европската дигитална легислатива. Ова е клучен чекор кон модерна, дигитална администрација“, истакна Андоновски.
