Балкан

Луди цени: Погледнете што се можете да купите за 10 евра на одмор во Албанија

Што може да се купи за 10 евра во Албанија? Српска туристка за првпат летуваше во Саранда и остана воодушевена

Албанија сè почесто се вбројува меѓу најповолните европски летни дестинации – и тоа со причина.

Патничката блогерка Јана оваа година за првпат одлучила да го помине својот одмор во Албанија, поточно во приморскиот град Саранда, и, како што вели, не погрешила.

„Ако сакате да откриете скриен бисер на Албанија, Саранда е вистинско место. Градот се наоѓа на југот од земјата, на брегот на Јонското Море, во близина на Грција, и нуди сè што е потребно за идеален одмор – кристално чисто море, археолошки локалитети, прекрасни плажи и жив ноќен живот“, споделува Јана во видео објава на социјалните мрежи.

Што добивате за 10 евра во Саранда?

Следејќи го популарниот тренд меѓу патничките блогери, Јана одлучила да истражи што сè може да се купи за само 10 евра во Саранда – и резултатите пријатно изненадија многумина.

За нешто повеќе од 10 евра успеала да купи:

гиро – 2,50 евра

топка сладолед – 1 евро

кафе на плажа – 1,20 евра

големо шише вода – 0,50 евра

лименка газиран пијалак – 0,90 евра

чоколадо – 1,10 евра

магнет за фрижидер – 2 евра

лименка пиво – 1,30 евра

Иако вкупната сума малку го надминува психолошкиот праг од 10 евра, разновидноста и количината на купените производи говорат за крајно достапните цени. Како дополнителен бонус, лежалките на плажа биле бесплатни.

„Цените се идеални“, „Бев минатата година – воодушевена сум“, „Најповолна дестинација каде што сум патувала“, „Навистина изгледа прифатливо“ – се само дел од позитивните коментари под видеото што Јана го објави на Инстаграм.

Албанија – тивок ривал на Хрватска

Угледниот магазин Conde Nast Traveler лани ја вклучи Албанија меѓу најисплатливите земји за патување во светот, заедно со Србија, Унгарија и Македонија.

Во својата анализа тие ја посочија Албанија како значително поевтина од останатите европски земји и сè уште недоволно експонирана на туристичката мапа – што ја прави совршена за истражување пред да стане пренаселена. Посебен акцент беше ставен и на локалната кујна, која, според магазинот, е уште една голема предност на земјата.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.