Белград под блокада: Студентски протест со ултиматум до владата, Вучиќ одбива
Во Белград денеска се одржува протестот „Се гледаме на Видовден“, организиран од студенти и граѓани незадоволни од владеењето на Александар Вучиќ. Пред почетокот на протестот, студентите доставија два ултиматума до владата на Србија: распишување вонредни парламентарни избори и прекин на собирите на поддржувачите на Вучиќ во Пионирски парк.
Учесниците се собираат кај Правниот и Техничкиот факултет, по што се упатуваат кон Славија, каде што ќе се одржи протестната програма. На Плоштадот на Републиката и Пионирскиот парк, исто така, се собираат граѓани и симпатизери на владејачката СНС.
Опозициските медиуми известуваат за полициска блокада: комбиња и автобуси се запираат, одземаат регистарски таблички и се вршат вонредни технички прегледи. Градскиот превоз во центарот на Белград е прекинат, а железничкиот сообраќај е запрен поради наводна бомбашка закана.
Претседателот Вучиќ изјави дека „Србија не прифаќа ултиматуми“ и предвиде дека протестот ќе кулминира со насилство меѓу 20:45 и 21:45 часот. Тој најави воздржаност од страна на државните институции, но изрази сомнеж дека организаторите ќе бидат задоволни од исходот.
Во меѓувреме, групата Чаци – студентите што кампуваат пред парламентот – најавија литературна вечер. Паралелно, по повод Видовден, Владата одржува свечени настани во Крушевац, додека Вучиќ додели награди на поединци во Палатата на Србија.
