Тешка сообраќајна несреќа со фатални последици се случила вчера околу 16 часот на стариот магистрален пат Солун – Верија, на делницата меѓу Халкидони и Лудија, при што животот го загубија 44-годишен маж и неговиот 13-годишен син. Во несреќата учествувал и 34-годишен возач на камион од Македонија, кој веднаш бил уапсен од грчката полиција.
Според информации објавени од грчкиот портал protothema.gr, под засега неразјаснети околности дошло до жесток фронтален судир меѓу камионот и патничко возило во кое патувало четиричлено семејство.
Таткото починал на самото место, додека синот им подлегнал на повредите кратко по несреќата. Мајката (43) и нивниот помал син (9) се здобиле со тешки повреди и биле итно префрлени во солунската болница „Гениматас“.
Според изјава на близок роднина, семејството се враќало од шопинг во Солун кон нивниот дом во село во регионот Пела. Семејството е во шок, а точните причини за несреќата сè уште се утврдуваат.
Фотографиите од местото на настанот прикажуваат целосно уништено патничко возило, што сведочи за силата на ударот. Грчката полиција продолжува со истрагата.
