Италијанската влада најави дека од 2026 до 2028 година ќе издаде речиси 500.000 нови работни визи за државјани од земји надвор од Европската Унија, како дел од стратегијата за проширување на легалните миграциски канали и справување со недостигот на работна сила.
Според планот, веќе во 2026 година ќе биде дозволен влез за 164.850 странски работници, а до крајот на 2028 година вкупната бројка ќе достигне 497.550. Ова е втор сличен потег на премиерката Џорџа Мелони, откако нејзината десничарска коалиција ја презеде власта пред речиси три години. Претходно, меѓу 2023 и 2025 година, владата веќе одобри издавање на над 450.000 дозволи за странски работници.
Одлуката се темели врз реалните потреби на италијанската економија, особено во секторите како што се земјоделството и производството на храна. Според Министерството за надворешни работи, квотите се одредени врз основа на податоци од претходните години и барањата на компаниите.
Италија, како трета најголема економија во еврозоната, се соочува со сериозен пад на наталитетот и стареење на населението. Во 2024 година, бројот на смртни случаи бил за 281.000 поголем од бројот на раѓања, а населението се намалило за 37.000, достигнувајќи 58,93 милиони жители.
Политиката за легална имиграција, сепак, е проследена со заострување на мерките против нелегалното влегување во земјата. Владата ја интензивира депортацијата на нелегални мигранти и ги ограничува активностите на хуманитарните организации што спасуваат мигранти во Средоземното Море.
Истражувањата на економскиот тинк-тенк Osservatorio Conti Pubblici укажуваат дека Италија ќе треба да прифати најмалку 10 милиони имигранти до 2050 година, доколку сака да го задржи тековното ниво на население.
