Република

Нови велосипедски и пешачки патеки ќе ги поврзат националните паркови „Пелистер“ и „Галичица“

Во Ресен денеска беше потпишан Меморандум за соработка меѓу Програмата за развој на Обединетите нации (УНДП), Општина Ресен и Националните паркови за обележување и уредување на 100 километри велосипедски и 70 километри пешачки патеки. Овие патеки ќе ги поврзат двата национални парка „Пелистер“ и „Галичица“, минувајќи низ заштитени подрачја во Преспа, со цел развој на интегрирана туристичка инфраструктура на отворено.

Градоначалникот на Општина Ресен, Јован Тозиевски, истакна дека туризмот во Преспа е еден од клучните столбови на локалната економија, а природните и културните богатства на регионот имаат огромен потенцијал што треба целосно да се искористи.

Директорот на Националниот парк „Пелистер“, Иванчо Тошевски, додаде дека се планира поврзување на преспанското село Брајчино со Големо Езеро на Пелистер, како и со селата од битолската страна Велушина, Трново и Магарево. Отворањето на граничниот премин Маркова Нога ќе овозможи создавање на цел прстен на велосипедски врски, кои ќе бидат дополнување на веќе постоечките патеки во регионот.

Проектот е поддржан од програмата „ЕУ за Преспа“, а ќе биде спроведуван до јуни 2027 година со средства од еден милион долари. Во рамките на проектот ќе се реализираат обуки и менторство за управување со туристички капацитети, развој на одржливи туристички производи и подобрување на услугите за посетителите.

Постојаниот претставник на УНДП во Македонија, Армен Григорјан, ја нагласи важноста на развојот на туризмот во Преспанскиот регион како мотор за локалниот економски раст и отворање нови можности, особено за младите.

Проектот „ЕУ за Преспа“ има за цел одржливо управување со природните ресурси и развој на „зелени“ патишта во земјоделството и туризмот, со што ќе се подобри квалитетот на живот во регионот.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.

Република

Општина Битола: Панел дискусија за унапредување на услугите од јавните претпријатија

Општина Битола и Советот на Општина Битола организираат панел дискусија на тема „Како до подобри услуги за граѓаните од јавните претпријатија“, со цел отворање поширока јавна дебата за улогата и предизвиците на јавните претпријатија како сервис на граѓаните.

Во изминатиот период, јавните претпријатија се соочија со сериозни предизвици, почнувајќи од последиците од ковид пандемијата, преку енергетската криза, до напорите за нивна финансиска и организациска стабилизација. Токму овие состојби ја наметнуваат потребата од системско унапредување на квалитетот на услугите што ги добиваат граѓаните.

На панел дискусијата ќе учествуваат градоначалникот на Битола, претседателот на Советот, директорите на јавните претпријатија, како и експерти од областа. Отворена е покана и за поранешни директори, пратеници, советници, претставници на граѓански организации и медиумите, со цел да се обезбеди инклузивна и конструктивна расправа.

Настанот ќе се одржи в петок, на 19 декември, со почеток во 13:30 часот, во киното „Манаки“ во Битола.