Министерката за енергетика, рударство и минерални суровини, Сања Божиновска, оствари исклучително значајна средба со Шарлот Ру, извршна директорка на Европската банка за обнова и развој (ЕБРД) за Централна и Југоисточна Европа. Средбата, која се одржа во Скопје, беше посветена на интензивирање на соработката во делот на енергетиката и унапредување на зелената транзиција во земјава.
Во фокусот на разговорот беа неколку клучни енергетски проекти, меѓу кои:
продолжението на ветерниот парк Богданци 2, интерконекторот за природен гас со Грција, идните фази за развој на хидроелектраната Козјак.
„Овие проекти не се само инфраструктурни, тие се основа на нашата долгорочна енергетска безбедност и независност“, истакна Божиновска.
Дополнително, се разговараше и за:
развој на националниот Грид мастер план, модернизација на СКАДА системот, унапредување на сајбер безбедноста во енергетскиот сектор, инвестиции во батериски системи за складирање на енергија.
Министерката подвлече дека ЕБРД останува клучен стратешки партнер на земјава во процесот на енергетска транзиција, дигитализација и изградба на одржливи решенија. Таа нагласи дека со ваквите инвестиции се гради енергетски систем кој е модерен, отпорен и ориентиран кон иднината, во служба на сите граѓани.
