Екстремен топлотен бран ја зафати Јужна Европа, при што температурите надминуваат 40 степени Целзиусови, а во шпанската провинција Хуелва е измерена рекордна температура од 46°C за месец јуни. Италија, Грција, Португалија и земјите од Западен Балкан се под директен удар на високи температури, проследени со шумски пожари и човечки жртви.
Во Италија, две лица ги загубија животите како последица на жештините – 47-годишен маж се онесвестил и починал на градилиште во Болоња, додека 70-годишен маж се удавил за време на нагла поплава во близина на Торино. Истовремено, и Франција прогласи највисоко ниво на тревога поради горештините, а предупредувања се активирани и во Белгија, западна Германија, Швајцарија и делови од Хрватска.
Светската здравствена организација (СЗО) издаде итно предупредување за „непотребни и спречливи смртни случаи“. Според Марисол Иглесијас Гонзалез, експертка за климатски промени и здравје од СЗО, прашањето веќе не е „дали“ ќе има топлотен бран, туку „колку често“ и „колку ќе трае“.
Истражувањата укажуваат дека само во периодот од 30 јуни до 3 јули, може да има над 4500 дополнителни смртни случаи во Европа. Најзагрозени се Италија, Хрватска, Словенија и Луксембург. Научниците предупредуваат дека високите температури, поттикнати од климатските промени и согорувањето на фосилни горива, ќе станат сè почести и посмртоносни.
Истовремено, вруќините годишно одземаат над 175.000 животи во европскиот регион на СЗО, кој се протега од Исланд до Русија. Според голема студија објавена во јануари, без сериозни мерки за адаптација кон климатските промени, бројот на жртви ќе расте драматично.
Здравствените власти ширум континентот ги повикуваат граѓаните на претпазливост, особено постарите, хронично болните и децата, додека климатските научници апелираат за итни и системски мерки на европско ниво.
