Онлајн анкета спроведена кон крајот на јуни 2025 со учество на над 1.000 млади од земјава открива значаен евроскептицизам, различни очекувања за членството во ЕУ и јасен повик за проактивност од националните и европските институции.
Истражувањето е дел од поширока анализа за ставовите на младите кон ЕУ и се реализира од Институтот за добро управување и евроатлантски перспективи (ИДУЕП Скопје), Европскиот Центар за извонредност (ECE Брисел) и Фондацијата „Фридрих Науман“, во соработка со платформата „Студентарија“.
Клучни наоди:
41% од младите имаат позитивен став кон ЕУ, 24% негативен, додека 35% се неутрални.
46.5% не веруваат дека Македонија ќе стане членка на ЕУ, 35.8% веруваат дека тоа ќе се случи, но подоцна, а само 6.7% очекуваат членство во следните пет години.
Корупцијата (84.6%), билатералните спорови (61%) и недовербата во институциите (60%) се посочени како главни пречки за интеграција.
53% се изјасниле дека се доволно запознаени со ЕУ вредностите и политиките.
Најголем интерес кај младите предизвикуваат можностите за работа и живот во ЕУ (76.2%), образовните програми како Еразмус+ (55.1%) и човековите права (50%).
41.6% би сакале да учествуваат во директен дијалог со ЕУ, 30.5% не, а 27.9% не се сигурни.
Албанија (53.2%) и Црна Гора (34.5%) се најчесто посочени како веројатни идни членки на ЕУ. Само 8.2% веруваат дека Македонија ќе влезе во ЕУ во следните пет години.
Комуникологот Бојан Кордалов од Европскиот центар за извонредност во Брисел предупреди дека овие податоци се аларм за итна акција: „Ако не им се понудат реални можности, младите сѐ помалку ќе гледаат иднина во ЕУ. Потребна е нова, искрена комуникација и цврсто партнерство со младите.“
Анкетата беше спроведена со поддршка на младинската платформа „Студентарија“. Учествуваа претежно студенти (81.5%), а резултатите ќе бидат објавени и како тематска публикација со конкретни препораки за институциите.
