Сателитски снимки откриваат активност во Фордо: Иран веројатно испитува штета од американски удари

Сателитски снимки од „Планет лабс ПБЦ“, анализирани од Асошиетед прес, откриваат засилена активност на иранскиот нуклеарен објект во Фордо, што укажува дека иранските претставници најверојатно ја испитуваат штетата предизвикана од неодамнешните американски напади со уништувачи на бункери.

Сликите покажуваат присуство на камиони, кран и багер во близина на тунелите на локацијата. Според анализите, постои можност дел од тунелите да биле пополнети како дополнителна заштита.

Интерес предизвикува и присуството на камиони пред нападите, што покренува прашања дали Иран можеби претходно ги отстранил збогатениот ураниум или центрифугите – тврдење што иранските власти постојано го повторуваат.

На политички план, иранскиот претставник Мохаџерани изјави дека не се очекуваат разговори со САД во скоро време, ниту е донесена одлука за продолжување на преговорите.

Паралелно со тоа, портпаролот на иранското судство, Асгар Џахангир, објави дека 935 ирански граѓани, меѓу кои 38 деца и 102 жени, загинале во израелските напади. Иранската новинска агенција ИРНА пренесува дека властите го обвинуваат „непријателот“ за намерни напади врз воени и научни цели.

Од друга страна, групата „Активисти за човекови права“ од Вашингтон проценува дека во нападите се убиени 1.190 лица, од кои 436 цивили и 435 припадници на безбедносните сили, додека над 4.400 лица биле ранети.