Американски извори објавија дека минатиот месец иранската војска натоварила поморски мини на бродови во Персискиот Залив, што ги загрижи властите во Вашингтон поради можноста Техеран да го блокира клучниот трговски пат – Ормутскиот теснец. Оваа акција се случи по израелските воздушни напади врз објекти во Иран, пренесува Ројтерс.
Според разузнавачки информации, овие подготовки следуваат по првиот ракетен напад на Израел врз Иран на 13 јуни. Иако мините не се поставени директно во теснецот, нивното натоварување укажува дека Иран може сериозно да размислува за блокада.
Ормутскиот теснец е важна транспортна рута низ која поминуваат околу 20 отсто од светската нафта и гас, па евентуална блокада би предизвикала раст на цените на енергенсите и сериозни нарушувања во глобалната трговија.
Иако цените на нафтата паднаа по американските напади врз ирански нуклеарни објекти, загриженоста за енергетска безбедност останува висока. Иран со години се заканува дека ќе го затвори теснецот, но никогаш досега не ја реализирал оваа закана.
Во 2022 година, иранскиот парламент ја поддржа идејата за блокада, но таа одлука не беше обврзувачка, а конечната одлука требаше да ја донесе Врховниот совет за национална безбедност.
Американските разузнавачки служби не открија како ги добиле овие информации, но се претпоставува дека се базираат на сателитски снимки и човечки извори.
Претставник на Белата куќа истакна дека, благодарение на американската операција „Полноќен чекан“ и кампањата за максимален притисок врз Иран, Ормутскиот теснец останал отворен и слободата на пловидба е зачувана.
Пентагон засега не коментираше за извештаите за натоварувањето мини, а официјални лица не ја исклучуваат можноста тоа да е и стратегиска глума од страна на Иран, со цел да го зајакне впечатокот за сериозноста на своите закани без вистинска намера за блокада.
Ормутскиот теснец ги поврзува Персискиот и Оманскиот Залив и е клучна рута за извоз на нафта од Саудиска Арабија, ОАЕ, Кувајт и Ирак. Иран поседува над 5.000 поморски мини, кои може брзо да бидат распоредени.
Петтата флота на САД, со седиште во Бахреин, е задолжена за заштита на поморската трговија во регионот. Американската морнарица обично одржува бродови за чистење мини, но тие беа повлечени во очекување на можно иранско одмаздничко дејствување по американските удари врз иранските нуклеарни објекти.
