Вршителот на должноста директор на Дирекцијата за заштита и спасување (ДЗС), Стојанче Ангелов, вчера потпиша договор за повторен ангажман на двајцата искусни пензионирани пилоти Стоје Арсовски и Васко Михалчев, кои ќе управуваат со противпожарните авиони „Air Tractor“.
Со нивниот ангажман, авионите на ДЗС повторно ќе бидат целосно оперативни и подготвени за интервенција при гаснење пожари на отворен простор низ територијата на Република Македонија, во услови на зголемен ризик од шумски и полски пожари.
Од Дирекцијата информираат дека вториот авион од типот „Air Tractor“, кој беше на редовен сервис во Австрија, се очекува наскоро да биде вратен и ставен во функција, со што двете летала ќе бидат ставени во готовност за време на летната противпожарна сезона.
„Обновувањето на воздухопловната оперативност е клучен дел од нашата стратегија за брза и ефикасна реакција при пожари, особено во руралните и планинските предели каде што пристапот по копно е отежнат“, велат од ДЗС.
Ангажманот на Арсовски и Михалчев, кои имаат долгогодишно искуство во пилотирање на специјализирани авиони за гаснење пожари, претставува важен чекор кон зголемување на капацитетите на земјата за справување со природни непогоди и заштита на човечките животи, животната средина и имотот на граѓаните.
