Пожарот во Валандовско ставен под контрола – ангажирани над 60 лица
Пожарот што утрово избувна во валандовскиот регион е ставен под контрола, информираат надлежните служби. Од 5 часот наутро, повеќе од 60 лица се наоѓаа на терен, активно работeјќи на гаснење на огнената стихија.
„Иако пожарот беше обемен, целата линија на огнот е покриена. Екипите остануваат на терен и во текот на денот поради очекуваните високи температури“, информираат од ЈП „Македонски шуми“, чија поддршка пристигна од подружниците во Валандово, Гевгелија и Струмица.
Во акцијата беа вклучени и противпожарните единици од Валандово, Струмица, Гевгелија, Радовиш и Кавадарци, како и доброволното противпожарно друштво и шумската полиција. Општината Валандово активно се вклучи во координацијата и поддршката на терен.
Надлежните изразија голема благодарност до сите служби, институции, граѓани и компании кои помогнаа во спречувањето на поголема катастрофа. Тимовите остануваат будни и подготвени за нови предизвици.
