Балкан

Мечка уби мотоциклист во Романија – трагедија поради обид за хранење див ѕвер

Семејна мотоекскурзија во Романија заврши со трагедија кога мечка нападна и уби 39-годишен мотоциклист од Италија во близина на езерото Балеа, во ловиштето „Арефу 5“. Несреќниот маж бил дел од група што патувала низ живописниот пат Трансфагарашан, кога привремено застанале покрај патот.

Според румунските медиуми, мечката се појавила ненадејно и го нападнала Италијанецот, влечејќи го во длабока јама од 40 метри во шумата. Телото на жртвата било подоцна извлечено од пожарникари и спасувачи, а на местото присуствувале и вооружени жандарми, поради опасноста мечката сè уште да е во близина.

Италијанскиот мотоцикл бил пронајден покрај патот, со ракавици на него, а мобилниот телефон на жртвата бил лоциран во јамата. Според наодите на полицијата, на телефонот биле најдени фотографии и видеа направени непосредно пред нападот, на кои се гледа како жртвата се обидува да ја нахрани мечката од рака.

Мечката подоцна била лоцирана и убиена од страна на жандармеријата.

Инцидентот се случил во подрачје богато со кафеави мечки – според Министерството за животна средина, во Романија живеат над 10.000 единки, а трасата Трансфагарашан е позната по честите средби со диви животни. Властите редовно апелираат до туристите да не се приближуваат до мечки, да не ги хранат и да одржуваат безбедно растојание.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.