Балкан

Туристка во Хрватска: „Нема жива душа, а пивото чини 8,5 евра – ова не е нормално!“

Потпретседателката на Словенското велосипедско друштво „Рог“, Маја Овен, остро ги критикуваше цените во угостителските објекти во градот Хвар, Хрватска. Таа на 29 јуни преку објава на „Фејсбук“ изрази незадоволство од „ненормалните“ цени, тврдејќи дека локалите се празни, а цените енормно високи.

„Хвар, денес во 18:30 часот – празни локали. Не се сеќавам дека некогаш сме платиле пиво 8,5 евра“, напиша таа, приложувајќи и фотографии од менијата. Според неа, шпагети болоњезе чинат 29 евра, дневна чорба 11 евра, а десерт 12 евра. Освен тоа, Овен посочи дека повеќето локали бараат плаќање во готово и не издаваат фискални сметки.

„Ако сте биле на Хвар, нема потреба да одите годинава. Ако не сте – почекајте да се вратат во нормала“, порача таа.

Нејзината објава предизвика лавина коментари со слични искуства. „Иста приказна во Пореч. Нема луѓе, а однесувањето е за секоја критика“, напиша една корисничка. Други коментираа дека Хрватска се обидува да се претвори во „модно летувалиште за богатите“, но притоа ги одбива традиционалните туристи од регионот.

Некои туристи велат дека во околината на Задар ситуацијата сè уште е поднослива: „Големо пиво на плажа 3,5 евра, храна 12 до 20 евра“.

Иако официјалните бројки покажуваат пораст на туристичкиот промет – 12% повеќе ноќевања и речиси 19% пораст на фискализирани сметки во јуни – впечатокот на терен е поинаков. На социјалните мрежи и блогови сè почесто се појавуваат примери од несекојдневни цени: крема за сончање 30 евра, чоколадо над 8 евра, чипс 4 евра, минерална вода 6 евра, лежалки како луксуз.

Министерот за туризам, Тончи Главина, тврди дека Хрватска сè уште нуди добра вредност за парите и повика на воздржаност во јавните критики, предупредувајќи дека негативниот наратив може да ѝ наштети на репутацијата на земјата. Сепак, ако трендот со цените продолжи, Хрватска ризикува да го изгуби имиџот на пристапна и гостопримлива медитеранска дестинација.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.