Германската влада разгледува нов модел на воена служба што би започнала како доброволна, со можност за премин кон задолжителна, доколку не се постигне доволен одзив. Како што пренесуваат неколку германски медиуми, министерот за одбрана Борис Писториус (СПД) го претставил нацрт-законот пред членовите на Бундестагот.
Предлогот предвидува шестмесечна доброволна служба со можност за продолжување според желбите на регрутите. Во текот на основниот период, младите би биле обучувани за полесни задачи, како обезбедување и инспекции, додека продолжената служба би вклучувала и професионална обука.
Нацрт-законот исто така вклучува можност за враќање на задолжителната воена служба, доколку доброволниот модел не обезбеди доволен број регрути. За таа цел, до сите мажи од една генерација би бил испратен прашалник за нивната подготвеност да служат, додека за жените пополнувањето би било доброволно.
Планот е дел од пошироките напори на Писториус за зголемување на воениот капацитет на Бундесверот на 460.000 лица, во услови на растечки безбедносни закани, особено од Русија.
Иако предложеното решение засега е базирано на доброволност, експертите предупредуваат дека Германија тешко ќе ги исполни воените цели без воведување на задолжителна регрутација. Внатрешниот отпор кон таквата мерка најмногу доаѓа од редовите на Социјалдемократската партија, која заедно со ЦДУ/ЦСУ ја формира владината коалиција.
Задолжителната воена служба беше укината во 2011 година, откако Уставниот суд оцени дека постоечкиот систем не обезбедува еднаков третман на сите граѓани од истата генерација.
