Според последните податоци од Центарот за управување со кризи (ЦУК), заклучно со 13 часот на 5 јули 2025 година, на територијата на државата се евидентирани вкупно осум пожари на отворен простор. Од нив, четири се активни, додека останатите четири се целосно изгаснати.
Најсериозните пожари се регистрирани на следниве локации:
Во општина Прилеп, во атарот на селото Бешиште, е активен приземен пожар што зафаќа квалитетна мешана шума.
Во општина Македонски Брод, во реонот на село Црешнево, местото викано Церо Поле, гори деградирана дабова шума и густа ниска вегетација.
Во општина Чашка, под Солунска Глава, помеѓу Изворите на Бабуна и Бабина Дупка, активен е шумски пожар кој во моментот не покажува пламен, туку чад на карпест терен.
Во општина Велес, евидентиран е пожар што зафаќа ниска вегетација.
Од друга страна, успешно се изгаснати пожарите на следниве локации:
Во село Врањовци, општина Врапчиште – зафатена беше ниска вегетација и ѓубриште.
Во село Лојане, општина Липково – гореше ниска вегетација и стрниште.
Во село Радање, општина Карбинци – изгаснат е пожар на земјоделска површина со посеано жито и ниска вегетација.
Во село Орланци, општина Арачиново – гореше ниска вегетација и отпаден материјал.
Надлежните служби се на терен и продолжуваат со мониторинг и интервенции на критичните точки. ЦУК апелира до граѓаните да бидат внимателни и да не палат отпад или стрништа на отворено, особено во услови на високи температури и засилен ветер.
