Министерот за внатрешни работи, Панче Тошковски, на денешната прес-конференција во Владата истакна дека државата покажува решителност во справувањето со организираниот криминал и корупцијата.
„Во изминатата година разбивме 14 организирани криминални групи, со над 200 сторители. Меѓу нив и брутална група вмешана во девет убиства, изнуди и напади врз полицијата,“ рече Тошковски, нагласувајќи дека институциите нема да толерираат насилство и дека државата си ја враќа силата.
Успеси во борбата против дрогата
Министерот презентираше дел од најзначајните резултати на МВР во изминатите 12 месеци.
Во рамки на акциите против трговијата со дрога, откриени се над 860 кривични дела, запленети се повеќе од 430 килограми наркотици, меѓу кои и рекордни количини кокаин, како и над 6 тони марихуана одземена од компании за канабис. Спречени се и три обиди за меѓународен шверц.
Корупција тешка 17 милијарди денари
Тошковски посочи дека се води активна борба и против корупцијата. Поднесени се кривични пријави против 107 физички и 18 правни лица, со вкупна штета за државата проценета на над 17 милијарди денари.
Корупциски случаи се откриени во сектори како здравство, енергетика и даночниот систем. „Ова покажува дека нема недопирливи и дека правдата ќе стигне до секого. Преземаме мерки за да се вратат украдените пари кај граѓаните,“ истакна министерот.
Безбедноста во сообраќајот – и натаму загрижува
Во делот на сообраќајната безбедност, Тошковски призна дека состојбата сè уште не е задоволителна.
„Иако има напредок и намалување на тешките сообраќајни несреќи, сè уште премногу луѓе ги губат животите на патиштата,“ рече тој, најавувајќи дека преку проектот „Безбеден град“, ќе се работи на подобрување на функционалноста и безбедноста во урбаните средини.
