Лекарите предупредуваат на ран симптом на остеопороза што често се занемарува

Остеопорозата е тивка и подмолна болест која обично останува незабележана сè додека не дојде до фрактура на коските – и токму затоа претставува сериозна закана, предупредуваат лекарите.

„Најголемиот проблем со остеопорозата е што не постојат доследни и рани симптоми кои можеме да ги следиме пред да се случи фрактура поради кршливост на коските. Затоа е клучно редовно да се следи состојбата на коските“, вели д-р Брајан Галагер, ортопедски хирург, за магазинот Parade.

Иако симптоми како што се намалување на телесната висина или промени во држењето се добро познати индикатори, експертите укажуваат и на еден ран знак што често останува незабележан – и се појавува токму во усната празнина.

„Повлекувањето на непцата може да биде еден од првите симптоми на остеопороза“, објаснува д-р Памела Мехта, ортопедски хирург и медицинска советничка.

Стоматологот д-р Картик Антани дополнува дека пациентите често мислат дека се работи само за проблем со непцата, но во реалноста тоа може да значи дека коската под нив се разградува. Бидејќи остеопорозата е болест на коските, таа директно го зголемува ризикот од парадонтоза – заболување на непцата што ја оштетува коската околу забите.

Оние кои еднаш доживеале фрактура предизвикана од остеопороза, имаат значително поголем ризик за повторна повреда, предупредуваат лекарите.

Меѓу другите рани симптоми што честопати се занемаруваат се и тешкотии при стискање на шаката, отворање шишиња или задржување предмети во рацете – што може да укажува на намалена густина на коските. Исто така, кршливите нокти можат да бидат знак на остеопороза, бидејќи и ноктите и коските содржат слични протеински врски.

Во некои случаи, дури и отежнатото дишење може да биде поврзано со компресија на пршлените, што го намалува капацитетот на белите дробови.

Добрата вест, според лекарите, е дека остеопорозата може да се спречи или барем да се забави нејзиниот развој. Д-р Бетси Батчер препорачува престанок со пушењето, умерена консумација на алкохол и редовна физичка активност, како што се пешачење, вежби за сила и баланс.

Внесот на доволно количество калциум и витамин Д преку исхрана или суплементи исто така е од суштинско значење. „Млечните производи со малку масти, зеленото лиснато зеленчук, рибата и збогатените производи се добри извори на калциум“, додава д-р Мехта.

На крајот, д-р Галагер нагласува дека раната дијагностика е клучна, особено кај постарите лица и оние со семејна историја на болеста.

„Луѓето кои еднаш претрпеле фрактура поради остеопороза имаат значително зголемен ризик за втора. Затоа е клучно да се интервенира навреме“, заклучува тој.