ЛАДЕН ВОЗДУХ ОД СЕВЕР: Македонија ја очекува голема температурна промена!
По овој многу топол бран од Африка, како што претходно најавив, од средината на следната седмица Македонија ја очекува голема температурна промена. Станува збор за продор на значително поладен воздух кој од северозапад ќе се спушти кон нашата Република Македонија.
Од среда (9 јули), особено од вечерта и ноќта кон четврток (10 јули), како и во вториот дел од следната седмица ќе имаме пониски температури од сегашните дури и за повеќе од 10 степени. Сепак, овој значително поладен бран од север ќе ни биде релативно сув, а само во среда ( 9 јули) особено во западните и во северните предели ќе има повремен локален дожд.
Во вториот дел од следната седмица температурите преку ден ќе се искачуваат во интервалот од 24 до 33 степени, додека наутро ќе биде многу посвежо, па така температурите во нашата Македонија, особено во Беровскиот регион, повисоките места и планините ќе се спуштат под 10 степени.
Да напоменам дека следната седмица ќе ни биде многу ветровита, односно, ќе дува засилен, повремено силен ветер од југозападен и од запад, а од среда навечер (9 јули) од северен правец (повремено и локално со брзина од над 70 км/час).
После ова големо освежување, барем одсега гледано и според она што во моментов го цртаат прогностичките материјали нема во најава премногу топло време со многу високи температури на воздухот како што имаме сега.
