Украина: Русија се обидува да го вклучи Лаос во војната, под изговор на хуманитарна мисија
Украинската воена разузнавачка служба (ХУР) тврди дека Русија се обидува да ја вовлече и Народна Демократска Република Лаос во војната против Украина, прикажувајќи го ангажманот како дел од наводна хуманитарна соработка.
Според соопштението на ХУР, Москва планира да распореди комбинирана единица од околу 50 воени инженери од вооружените сили на Лаос во Курската област, во близина на украинската граница. Официјалната цел на нивното присуство, според руската страна, е учество во операции за деминирање на регионот – област која беше привремено окупирана од украинските сили за време на прекуграничната офанзива, а потоа повторно вратена под руска контрола со поддршка од севернокорејски трупи.
Покрај инженерските тимови, Лаос наводно понудил и бесплатни рехабилитациски услуги за руските војници повредени на фронтот.
Украинското разузнавање ја оценува оваа активност како обид на Кремљ да го легализира присуството на странски воени сили на своја територија и индиректно да ги вклучи во борбените дејствија против Украина. Според ХУР, ваквите ангажмани се претставуваат како хуманитарни мисии, додека во пракса се користат за воени цели.
Москва, според украинските власти, веќе се потпира на странски борци од Азија, Африка и Северна Кореја, во обид да ги надомести сопствените човечки загуби и да го зајакне фронтот. Лаос, кој одржува блиски односи со Русија и Кина, засега не даде официјален коментар за овие обвинувања.
