Скопје

Ѓорѓиевски: Ќе го вратиме сјајот на Скопје – ова е заедничка мисија, не лична битка

Орце Ѓорѓиевски, кандидатот на ВМРО-ДПМНЕ за градоначалник на Скопје, преку силна и емотивна порака до граѓаните најави дека со целосна посветеност и работа на терен ќе се бори за ново лице на главниот град. Тој вети дека ќе остане ист човек – близок до народот, достапен и секогаш присутен таму каде што се чувствува вистинскиот живот.

„Со срце полно благодарност и со огромно чувство на одговорност, го прифаќам предизвикот да бидам кандидат за градоначалник на Скопје. Ќе бидам градоначалник кој работи повеќе од што зборува, кој слуша повеќе од што ветува, и кој е секогаш на терен, со народот,“ порача Ѓорѓиевски.

Тој вели дека не верува во политичка дистанца од луѓето и дека нема да биде класичен салонски политичар. „Јас сум воркохолик, и таков ќе останам – посветен, достапен и секогаш во движење,“ рече тој, додавајќи дека Скопје ќе го извлече од сивилото и занемареноста во кои се наоѓа.

Ѓорѓиевски се заблагодари за поддршката од граѓаните, од неговиот тим и од ВМРО-ДПМНЕ, посебно истакнувајќи ја довербата што му ја укажале претседателот Христијан Мицкоски и Извршниот комитет на партијата.

„Скопје повторно ќе заживее. Ќе го направиме град на културата, иднината, безбедноста и достоинството. Ќе биде град на инспирација, не на разочарување. Ќе го направиме европска метропола – рамо до рамо со најдобрите,“ вети Ѓорѓиевски.

На крајот, тој упати отворен повик за поддршка до сите граѓани, без разлика на нивните политички убедувања:

„Кај мене нема поделби – постојат само луѓе кои го сакаат Скопје. А јас го давам мојот збор: ќе го вратиме сјајот на нашиот град.“

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.