Активни четири пожари на отворен простор во Македонија, локализиран пожар на депонија во Делчево

На територијата на Република  Македонија заклучно со денеска до 13 часот се активни вкупно четири пожари на отворен простор, додека еден пожар е локализиран, соопшти Центарот за управување со кризи.

Активни пожари има во општините Прилеп, Македонски Брод и Чашка. Во Прилеп, пожарите се регистрирани во селото Бешиште, каде гори приземна квалитетна мешана шума, како и кај гробиштата во градот, каде гори ниска вегетација.

Во Македонски Брод, активен е пожарот во селото Црешнево, на местото Церо Поле, во деградирана дабова шума и грмушки. Во општина Чашка, пожарот е под Солунска Глава, во близина на Изворите на Бабуна и Бабина Дупка, каде што гори шумски пожар без активен пламен, но со присуство на чад на карпест терен.

Локализиран е пожарот на депонијата во Делчево. Надлежните апелираат до граѓаните да ги почитуваат препораките за претпазливост и да ги пријавуваат сите сомнителни активности што можат да доведат до нови пожари.