Нов сој на коронавирусот „стратус“ под лупа на СЗО: Се најавува ли нов бран инфекции?
Светската здравствена организација (СЗО) го стави новиот сој на коронавирусот, познат како „стратус“ (научно означен како XFG), под надзор поради потенцијалното влијание врз јавното здравје. Овој сој веќе стана доминантен во Велика Британија и се смета за најзаразен досега, благодарение на мутации кои му овозможуваат да го избегнува имунолошкиот систем.
Според податоците на британската Агенција за здравствена безбедност, „стратус“ за краток период пораснал од 10% во мај на речиси 40% од сите случаи во јуни. Овој „рекомбинантен“ сој е хибрид на две претходни варијанти на ковид, што ја зголемува неговата способност за ширење.
Професорот Лоренс Јанг од Универзитетот Ворвик посочува дека подваријантите XFG и XFG.3 се особено заразни, а тоа може да доведе до нов бран инфекции. Сепак, досега нема докази дека предизвикуваат потешка клиничка слика, а постојните вакцини, според него, веројатно и натаму нудат заштита од тешка болест и хоспитализација.
Покрај „стратус“, се шири и уште една нова варијанта наречена „нимбус“, која во јуни достигна 17% застапеност во Велика Британија. Лекарите предупредуваат дека нејзините симптоми, како болно грло „како да сте проголтале жилет“, се особено изразени.
И покрај растечкото присуство на новите варијанти, вкупниот број на случаи на ковид бележи опаѓање во споредба со претходните недели. СЗО засега го оценува ризикот од „стратус“ како низок, но ги повикува здравствените власти ширум светот внимателно да го следат неговото ширење.
