Црна Хроника

Тројца загинати, меѓу нив и македонски државјанин, во тешка сообраќајна несреќа во Бугарија

Тројца загинати, меѓу нив и македонски државјанин, во тешка сообраќајна несреќа во Разград

Тројца мажи загинаа ноќеска во тешка сообраќајна несреќа во Разград, североисточна Бугарија, кога автомобил управуван од 19-годишен возач удрил во маси поставени пред угостителски објект. Меѓу жртвите е и македонски државјанин со постојан престој во Бугарија, јавуваат бугарските медиуми.

Несреќата се случила околу 1:36 часот по полноќ на улицата „Грнчарска“. Возачот, кој бил зад воланот само една година, изгубил контрола врз возилото, при што удрил директно во маса на летна тераса, каде што седеле тројцата загинати – на возраст од 64, 52 и 68 години.

Според првичната истрага, автомобилот најверојатно претекнувал друго возило, а при маневрот едното тркало влегло во локва, по што возачот ја изгубил контролата. Како што изјави окружниот јавен обвинител за Бугарското национално радио, жртвите „се нашле во сендвич помеѓу движечкиот и паркиран автомобил“.

Тинејџерот не покажал присуство на алкохол или дрога при првичните тестови, но се земени примероци за дополнителни анализи. Автомобилот бил во сопственост на неговиот татко.

Возачот е прво задржан во полициски притвор 24 часа, кој подоцна е продолжен на 72 часа. Истрагата за трагичниот инцидент е во тек.

Црна Хроника

Со секира во казино: Бараше назад изгубени пари – доби 8.600 денари од шокирана касиерка

Вистински хорор се случувал на 15 декември во казино на најфреквентната битолска улица. Револтиран од загубата на апаратите, 53-годишен битолчанец решил правдата да ја земе во свои раце – и тоа со секира. Откако претходно ги прокоцкал своите средства, тој извадил ладно оружје скриено под јакната и со замавнување ја присилил вработената да му „врати“ 8.600 денари од прометот.

Осомничениот, кој и претходно му е познат на законот, сега се соочува со истрага за разбојништво. Обвинителството во Битола веднаш побара притвор, алармирајќи дека овој „рецидивист“ со секира претставува сериозна опасност за околината и дека лесно би можел да го повтори делото или да исчезне.

Црна Хроника

Насилство меѓу ученици во Скопје: малолетник претепан пред основно училиште

Малолетно дете било физички нападнато од свои соученици пред основно училиште на подрачјето на општина Гази Баба, соопштија од полицијата.

Според пријавата во СВР Скопје, на 15 декември 2025 година во 11:30 часот, А.Џ. (37) од Скопје пријавила дека инцидентот се случил на 12 декември околу 12:00 часот, кога нејзиниот малолетен син бил нападнат од тројца негови соученици пред училишниот објект.

По пријавениот случај, надлежните служби започнале постапка за утврдување на сите околности поврзани со инцидентот. Од СВР Скопје информираат дека се преземаат соодветни мерки за целосно расчистување на случајот.

Црна Хроника

Почина поранешен ММА борец на 45 години

Поранешниот ММА борец Џеронимо „Мондрагон“ дос Сантос почина на 45-годишна возраст, откако трагично се удавил во реката Рио Негро во Бразил. Веста за неговата смрт беше потврдена по неколкудневна потрага, а телото беше пронајдено на неколку километри од местото каде што последен пат бил виден.

Несреќата се случила во саботата, на 13 декември, кога Дос Сантос престојувал на плажа покрај реката заедно со својот партнер. Тој решил уште еднаш да се нурне пред заминување, но повеќе не излегол на површината. Подоцна неговиот брат открил дека „Мондрагон“ не знаел да плива. Иако веднаш била организирана спасувачка акција со бродови, потрагата завршила трагично.

Телото било пронајдено во понеделникот, 15 декември, од нуркачи на противпожарната служба, потопено под карпи во речното корито. Општината Сао Габриел да Качоеира официјално ја потврди смртта и прогласи тридневна жалост.

Дос Сантос зад себе остави богата, но и турбулентна боречка кариера. Во професионалниот ММА имаше скор од 45 победи, 26 порази и едно реми, настапувајќи во повеќе меѓународни организации. Дел од својата кариера ја мина и во хрватската организација FNC, каде во септември 2022 година се бореше за титулата во тешка категорија.

Во 2012 година потпиша договор со UFC, но неговото деби никогаш не се реализираше откако медицинските тестови покажаа дека има хепатитис Б. Поради здравствените проблеми и недобиената дозвола за настап, две години подоцна побара раскин на договорот.

Неговата последна борба ја имаше во април годинава во Bare Knuckle Fighting Championship, каде со нокаут во првата рунда го совлада поранешниот UFC борец Алексеј Олеиник. Планираниот меч со Андреј Арловски во јуни беше откажан.

Смртта на Џеронимо „Мондрагон“ дос Сантос предизвика бројни реакции во боречката јавност, која го памети како борец со силен дух и необичен животен пат.