Во серија воздушни напади извршени од израелската армија врз Појасот Газа, загинаа најмалку 33 Палестинци, соопштија денеска здравствени власти од палестинската енклава. Истовремено, израелската армија објави дека од саботата досега погодила над 130 цели низ територијата.
Според директорот на болницата „Шифа“ во градот Газа, д-р Мохамед Абу Селмија, најмалку 20 лица загинале, а уште 25 се повредени во напад на две станбени куќи во центарот на градот.
Во јужниот дел од енклавата, во приморскиот регион Мувасија кај Кан Јунис, уште 13 цивили загинале во израелски напади, потврдија медицински извори од болницата „Насер“. Тој регион е познат по тоа што таму живеат бројни раселени лица во импровизирани шатори и кампови.
Израелската армија соопшти дека нападите биле насочени кон командни пунктови и логистички структури на Хамас, складишта со оружје и позиции на милитантите во северниот дел од Појасот Газа. Според нив, во нападите биле елиминирани и повеќе борци на Хамас.
