Македонија

Димовски: Не смее да се молчи за негацијата на македонскиот народ, јазик и идентитет

Европратеници од Грција и Бугарија, под покривот на Европската Унија, јавно го негираат постоењето на македонскиот народ, неговиот јазик и идентитет, како и нашето право на името Македонија. Овој проблем, како што вели поранешниот пратеник од ВМРО-ДПМНЕ, Илија Димовски, не смее да се преќутува од патриотски и интелектуални причини.

Според Димовски, ваквите настапи не се спорадични или ретки, туку дел од долгогодишни државни стратегии на двете соседни земји кои систематски создаваат „научни“ трудови, правни акти и вршат дипломатски притисоци со цел сведување на македонскиот национален субјективитет на фолклорна географска аномалија.

„Македонскиот народ и јазик постојат, со временски и географски континуум што е поширок од границите на модерната македонска држава. Македонско малцинство има и во Бугарија и во Грција, каде што основните човекови права им се често ускратени“, потенцира Димовски.

Тој нагласува дека самоприпишувањето како Македонец е природно право кое ниту една демократска држава нема право да го ограничува, без разлика на какви договори или меѓудржавни акти станува збор.

„Република Македонија не е само административен ентитет, туку клучна основа на македонскиот историски проект. Ако државата не ги заштити правата на секој Македонец внатре и надвор од границите, тогаш ја губи смислата на своето постоење“, додава Димовски.

Тој јасно порачува дека македонскиот јазик, историја, име и идентитет не смеат да бидат предмет на политички размена, а Европа може да биде партнер само доколку го признае македонскиот народ и неговото право на почитување на универзалните стандарди за човекови права.

„Ако молчиме, се согласуваме со негацијата. Македонците бараат почитување на своите човекови права во Македонија, но и во сите соседни држави“, заклучува Илија Димовски.

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.

Македонија

Над 40 државни институции преминаа на електронско управување со документи

Повеќе од 40 институции во државата веќе го користат националниот Документ менаџмент систем (ДМС), што овозможува побрзи и поефикасни услуги за граѓаните, соопшти министерот за дигитална трансформација Стефан Андоновски во изјава за медиумите.

Според него, поврзувањето на институциите и општините преку единствен дигитален систем претставува суштинска реформа во функционирањето на државната администрација, со фокус на поедноставени и подостапни јавни услуги.

Андоновски информираше дека за само четири месеци е двојно зголемен бројот на институции кои користат електронска архива и електронски систем за управување со документи. Дополнително, преку државната платформа за интероперабилност, само во ноември биле реализирани 2,6 милиони трансакции, што претставува значителен раст во однос на просекот во текот на 2024 година.

Министерот посочи и дека за 20 проценти е зголемен бројот на институции и компании приклучени на платформата за интероперабилност, што директно придонесува за намалување на административните процедури и потребата граѓаните да доставуваат документи од една до друга институција.

„Овие резултати значат помалку хартија, помалку чекање и помалку простор за корупција. Дигиталната трансформација не ја третираме како ИТ-проект, туку како реформа во корист на граѓаните, со јасни и фер процедури“, истакна Андоновски.

Тој додаде дека целта е институциите да функционираат брзо, разбирливо и еднакво за сите, а Министерството за дигитална трансформација останува посветено принципот „граѓаните на прво место“ да стане стандард во работењето на државата преку конкретни и мерливи резултати.

Македонија

Собранието ги усвои клучните закони за проектот „Безбеден град“

Собранието во рамки на попладневниот дел на 76. седница без расправа ги донесе измените и дополнувањата на повеќе закони кои се дел од пакетот потребен за целосно функционирање на системот „Безбеден град“. Со 65 гласа „за“ и ниту еден „против“ или „воздржан“, пратениците усвоија измени на Законот за извршување на санкциите, Законот за полиција, Законот за возила и Законот за безбедност на сообраќајот на патиштата, сите по скратена постапка.

Пратеникот Бојан Стојановски од ВМРО-ДПМНЕ истакна дека законот е дел од шесте законски измени кои обезбедуваат имплементација на еден од најзначајните проекти во историјата на Македонија, кој започна пред неколку недели и практично ќе стартува од 1 февруари.

Законот за прекршоци, исто така дел од пакетот, воведува посебна постапка за прекршоци констатирани со технички средства и уреди за снимање, вклучително електронска достава преку текстуални пораки или е-пошта, 50% намалување на глобата при доброволно плаќање во рок од осум дена, како и автоматско суспендирање на возачката дозвола по акумулирање на три забрани во четири години. Пратеничката Моника Трајанова од ВМРО-ДПМНЕ објасни дека измените ќе го зголемат ефектот на превенцијата, ќе намалат административни трошоци и ќе ја зголемат ефикасноста на постапките.

Стојановски додаде дека законите овозможуваат одземање на возило на несовесни возачи, како и подобрување на процесот на издавање возачки дозволи, со зголемена транспарентност и контрола врз членовите на комисијата која ги доделува дозволите.

Во рамки на истата седница, пратениците го усвоија и Законот за концесии и јавно-приватно партнерство, исто така по скратена постапка, со што се овозможува поефикасно реализирање на инфраструктурни и други јавни проекти.