Грција: Жена призна дека убила четири бебиња, вклучително и сестра ѝ
Ирини Мурцуку, 24-годишна Гркинка, вчера беше уапсена и обвинета за убиство на три бебиња, а денес, во полицискиот притвор, признала и четврто убиство – на својата сестра, извршено пред 11 години, кога имала само 14 години. Иако последниот случај е правно застарен, признанието предизвика шок во грчката јавност.
Според наводите на полицијата, Мурцуку признала дека две од убиените бебиња биле нејзини – едното усмртено на 19 јуни 2022 година, а другото на 17 октомври 2023 година. Третата жртва, бебе од нејзина пријателка, било убиено во февруари 2021 година. За четвртото дете, кое го убила кога имала 14 години, таа тврди дека било нејзина сестра.
„Секогаш кога се карав со мајка ми, сакав да направам нешто лошо“, изјавила осомничената пред инспекторите од Одделението за убиства, пренесува порталот Proto Thema.
Во првичната фаза од истрагата, Мурцуку ги негираше обвинувањата, иако сомнежите растеа по сведочењата на роднини, како и на медицински персонал од детски болници во Атина, Патра и Амалијада. Случајот доби пресврт кога таа, пред трансферот од Атина во Патра, наводно „пукнала“ и ги признала сите злосторства, пренесе Euronews.
Осомничената е обвинета и за обид за убиство во 2020 година, кога, според обвинението, се обидела да ја задуши пријателката на која подоцна ѝ го убила детето.
Според грчките медиуми, јавниот обвинител и истражниот судија кои го водат случајот, донеле одлука за апсење по темелна проценка на наодите од пулмолози, невролози и судски вештаци, во комбинација со сведочења.
Полицијата дополнително укажува дека доколку осомничената останеше на слобода, постоеше сериозен ризик од повторување на слични злосторства. Истражната постапка продолжува.
