Aмерикански претседател Доналд Трамп на приватен настан за собирање донации во 2024 година изјавил дека му се заканил на рускиот претседател Владимир Путин со бомбардирање на Москва, доколку Русија ја нападне Украина. Ова го открива аудио-снимка до која дошол Си-Ен-Ен, а која сега првпат излегува во јавноста.
„Му реков на Путин: Ако влезеш во Украина, ќе ја бомбардирам Москва. Немам друг избор“, се слуша гласот на Трамп. „Тој ми рече: Не ти верувам. Но, веруваше 10 проценти“, додал американскиот претседател.
Слична порака, според неговите зборови, му испратил и на кинескиот претседател Си Џинпинг, предупредувајќи го дека САД ќе го нападнат Пекинг ако Кина преземе воена акција против Тајван. „Мислеше дека сум луд“, изјавил Трамп. „Но, никогаш немавме проблем.“
Аудио-снимките се дел од новата книга „2024“, дело на новинарите Џош Дози, Тајлер Пејџер и Исак Арнсдорф, кои документираат изјави на Трамп од настани зад затворени врати одржани во Њујорк и Флорида. Од кампањата на Трамп не дадоа официјален коментар за објавената содржина.
