Технологија

Серија Samsung Galaxy Watch8: врвна удобност – од спиење до физичка активност

Galaxy Watch8 и Galaxy Watch8 Classic го спојуваат препознатливиот дизајн со нови персонализирани здравствени увиди, мотивирајќи ги корисниците кон поздрав животен стил

Њујорк / Скопје, 9 Јули 2025. – Samsung Electronics денес ги претстави Galaxy Watch8 и Galaxy Watch8 Classic¹, применувајќи го препознатливиот визуелен идентитет на целата Galaxy Watch линија. Надоградувајќи се на темелите на перничестиот дизајнот на Galaxy Watch Ultra, оваа серија се одликува со најтенкиот и најудобниот Galaxy Watch досега² за континуирано следење на здравјето. Серијата Galaxy Watch8 одговара на различни животни стилови и нуди напредни можности, поставувајќи нов стандард за стил и персонализирани здравствени искуства.

„Посветени сме на тоа да им овозможиме на милијарди луѓе поздрав начин на живот преку нашите иновативни технологии“, изјави TM Roh, претседател и в.д. раководител на одделот Device eXperience во Samsung Electronics. „Комбинирајќи функционален дизајн, напредни сензори и интуитивно корисничко искуство базирано на AI, Galaxy Watch8 серијата отвора врати кон поздрав, поповрзан живот, што го олеснува, повеќе од кога било досега, преземањето значајни чекори кон благосостојбата на корисниците“.

Редизајниран внатрешно и надворешно – за поголема добросостојба

Со ново обликување на формата и функциите, Galaxy Watch8 серијата обезбедува врвна удобност при носење, водечки перформанси и се претставува како совршен придружник за секојдневното здравје. Препознатливиот „перничест“ дизајн, првпат претставен на Galaxy Watch Ultra, сега го дефинира целото Galaxy Watch семејство. За да се постигне најмала дебелина досега, внатрешната структура на Galaxy Watch8 е целосно редизајнирана, а системот за интеграција на компонентите е подобрен за 30%, што резултира со 11% потенок дизајн во однос на претходниот модел. Благодарение на динамичките приклучоци, часовниците природно се движат заедно со зглобот, овозможувајќи подобра удобност при носење и подобрена стабилност², со што се овозможува подобро пристојување и унапредено следење на здравјето.

Елегантниот профил на Galaxy Watch8 е дополнет со извонредни перформанси. Дури и кога корисниците го носат на отворено под директна сончева светлина, екранот е 50% посветол², со максимална осветленост од 3000 нита за полесна читливост, а присутна е и подобрена батерија² која одговара на активен животен стил. Дополнително, двојнофреквентниот GPS систем овозможува попрецизно следење на локацијата², а најмоќниот 3-нанометарски процесор досега овозможува побрзи перформанси и подобра енергетска ефикасност. Единствениот BioActive сензор овозможува подетално и попрецизно мерење, со што Galaxy Watch8 серијата обезбедува сеопфатен увид во здравјето на корисникот.

Мотивација за долгорочни здравствени навики

Добриот сон е прозорец кон севкупната добросостојба; секоја мирна ноќ му овозможува на телото и умот обновување за новиот ден. Затоа Samsung постојано го унапредува искуството на следење на сонот, нудејќи „тренинг“ за спиење, помагајќи во создавање на најдобра средина за одмор и дури може да препознае умерени до силни знаци на апнеја при спиење. Дополнително, Galaxy Watch8 серијата доаѓа со нови, уникатни здравствени функции во апликацијата Samsung Health³, кои им помагаат на корисниците да изградат поздрави навики преку моментални и мотивирачки увиди – од спиење, исхрана до вежбање.

Водичот за време на спиење⁴ може да го измери циркадијалниот ритам и да предложи оптимално време за одмор, со цел корисниците да се разбудат освежени и одморени. Васкуларното оптоварување⁵, прво мерење од ваков вид, го следи нивото на оптоварување на васкуларниот систем за време на спиењето. Тоа нуди увиди во различни животни фактори, вклучително и сонот, стресот и активностите, и им помага на корисниците да усвојат севкупен пристап кон управување со здравјето.

Понатаму, Galaxy Watch8 серијата воведува и Антиоксидативен индекс⁶, уште една новина кај паметните часовници, што овозможува мерење на нивото на каротеноиди за само пет секунди, овозможувајќи донесување подобро информирани одлуки за поздраво стареење.

Без разлика дали се почетници или искусни тркачи, Galaxy Watch8 серијата нуди персонализирани фитнес увиди и мотивира токму кога е најпотребно. Тренерот за трчање⁷ ја пресметува кондицијата на скала од 1 до 10 и развива детална програма за тренинг со насоки и мотивациски увиди во реално време. Со подобрената функција Together, која сега може да следи и трчање, корисниците можат да предизвикуваат пријатели и семејство и да го претворат фитнес патувањето во игра.

Во случај на траен зголемен стрес, функцијата за предупредување за висок стрес веднаш ќе го извести корисникот да направи пауза и ќе помогне во управување со стресот во реално време. Со алатката за следење на свесноста, корисниците можат да го евидентираат расположението, а часовникот ќе ги води низ вежби за дишење за да го намалат стресот – директно од зглобот.

Дополнително, Енергетскиот резултат⁸, поткрепен со вештачка интелигенција, нуди увид во нивото на енергија, обединувајќи метрики од физичкото и менталното здравје, за корисниците секој ден да го започнат подобро подготвени.

Полесна интеграција со Wear OS 6 и Gemini

Развиена во тесна соработка со Google, Galaxy Watch8 серијата е првиот паметен часовник опремен со прединсталиран Wear OS 6 и Google Gemini⁹, AI асистентот на Google. Корисниците имаат слободни раце и можат преку природни гласовни команди да извршуваат задачи во движење со Galaxy Watch апликациите како Samsung Health, Календар, Потсетник и Часовник. На пример, можат да го замолат Gemini да најде блиско кафуле и да испрати порака на пријател да се најдат таму – сето тоа одеднаш. Или, доколку се подготвени да почнат со вежбање и имаат поставена цел, доволно е да кажат: „Започни трчање 30 минути.“ Часовникот интуитивно ќе ја активира вежбата во Samsung Health.

Дополнително, благодарение на новиот One UI 8 Watch, корисничкиот интерфејс е оптимизиран за големината и обликот на екранот. Новите Multi-info плочки овозможуваат лесен пристап до здравствени метрики, временска прогноза, настани и друго, преку едноставен преглед. Тука е и новата Now Bar и нов режим за известувања кој осигурува дека клучните активности остануваат во прв план.

Креиран за сечиј животен стил

Galaxy Watch 8, Galaxy Watch 8 Classic и новиот Galaxy Watch Ultra се достапни за претходна нарачка почнувајќи од денес, а општата достапност започнува на 25 јули¹⁰.

Новиот Galaxy Watch8 нуди елегантен и минималистички дизајн за секојдневна добросостојба. Достапен е во димензии од 44 или 40 милиметри, во графитна или сребрена боја, нудејќи удобност и стил за секојдневните активности.

Истовремено, Galaxy Watch8 Classic донесува безвременска елеганција на вашиот зглоб, со модерни функции како ротирачки прстен и копче за брз пристап, за дополнителна практичност. Моделот Classic е со пречник од 46 милиметри и е достапен во црна или бела боја. Двата модели можат да се комбинираат со голем број стилски ремчиња¹¹, прилагодени на различни животни стилови.

Корисниците кои сакаат активности на отворено ќе го најдат својот совршен придружник во Galaxy Watch Ultra – најнапредниот модел од Galaxy Watch серијата досега. Достапен во 4 тинаниумски бои, вклучително и новата титаниумска сина боја, овој паметен часовник нуди најдолг век на батеријата и најиздржливи перформанси досега.

Технологија

Еден од секои четворица тинејџери во Британија бара љубов и разбирање од вештачката интелигенција – човечки допир што често им недостасува во реалниот свет

Најновото истражување од Велика Британија открива алармантен тренд: секој четврти тинејџер се обратил до четботови со вештачка интелигенција (AI) за поддршка на менталното здравје во изминатата година. Ова доаѓа како јасен показател за длабоката криза во достапноста на соодветна, човечка поддршка за младите.

Добротворната организација Youth Endowment Fund (YEF), анкетирала неверојатни 11.000 деца на возраст од 13 до 16 години во Англија и Велс. Резултатите се загрижувачки: повеќе од половина од тинејџерите користеле некаков вид онлајн поддршка, а 25% експлицитно користеле AI четботови.

Она што е особено загрижувачко е што најистакнатите групи кои бараат помош од AI се оние кои се најмногу изложени на ризик.

38% од децата кои биле жртви на сериозно насилство побарале поддршка од AI четботови.
44% од децата кои биле сторители на сериозно насилство го сториле истото.

YEF сугерира дека анонимноста и достапноста 24/7 ги прават AI алатките привлечни за младите кои се борат и кои можеби се плашат или им е непријатно да разговараат со професионалец.

Среде овој пораст на „AI терапијата“, здравствените власти алармираат. Порано оваа година, NHS (Националната здравствена служба на Велика Британија) јавно ги повика младите луѓе да престанат да ги користат AI четботовите како замена за терапија, предупредувајќи дека тие можат да понудат „штетни и опасни“ совети.

Клер Мардок, директорка на националната служба за ментално здравје на NHS Англија, изјави за „Тајмс“:

„Слушаме некои алармантни извештаи за чет-ботови со вештачка интелигенција кои даваат потенцијално штетни и опасни совети на луѓе кои бараат третман за ментално здравје… Младите никогаш не треба да се потпираат на платформите за вештачка интелигенција за совети за ментално здравје.“

Експертите предупредуваат дека овие алатки не се опремени да се справат со сериозни ментални состојби и може дури и да ги влошат симптомите.

Аџада, член на младинскиот советодавен одбор на YEF, го изрази стравот на многумина:

„Вештачката интелигенција навистина ме плаши… Го губиме тоа емоционално, лично искуство што доаѓа со позитивни човечки интеракции.“

Фондот за младински прашања инсистира дека ова е симптом на неуспех на системот. Џон Јејтс, извршен директор на YEF, е недвосмислен:

„Мора да направиме подобро за нашите деца… Им треба човек, а не бот… За оние кои се погодени од насилство, разбирањето и емпатијата на доверлив возрасен можат да направат голема разлика.“

Истражувањето, исто така, ги зајакнува доказите за сериозноста на кризата со менталното здравје кај тинејџерите во Велика Британија. Повеќе од еден од четири пријавиле симптоми поврзани со високо или многу високо ниво на тешкотии во менталното здравје. 14% рекле дека се самоповредувале во изминатата година. 12% размислувале да си го одземат животот.

Четвртина од анкетираните имаат формална дијагноза за ментално здравје, а дополнителни 21% веруваат дека имаат состојба која не е дијагностицирана.

Додека технологијата нуди моментална утеха, експертите и младите истовремено предупредуваат дека нема замена за човечката емпатија, а порастот на „AI терапијата“ е само доказ за очајничкиот недостаток на достапна и безбедна професионална поддршка.

Технологија

Австралија ги забранува социјалните мрежи за малолетници – глобален шок во дигиталниот свет

Австралија влегува во историјата како прва земја во светот која воведува задолжителна минимална возраст за користење на социјалните медиуми, поставувајќи ја сцената за бран на глобална регулација што сите го очекуваа.

Од полноќ, дигиталниот пејзаж на Австралија драматично се менува. Десетте најголеми платформи, вклучувајќи ги Инстаграм, ТикТок и Јутјуб, ќе бидат принудени да повлечат драстичен потег: блокирање на повеќе од милион сметки на корисници помлади од 16 години.

Непочитувањето на новиот закон носи со себе застрашувачки последици: казни до 49,5 милиони австралиски долари (33 милиони американски долари). Овој потег го означува почетокот на живиот експеримент кој ќе го проучуваат законодавците ширум светот.

Застапниците за слобода на говорот и технолошките гиганти жестоко се спротивставија на законот, нарекувајќи го претерано мешање во модерното живеење.

Сепак, законот наиде на огромен аплауз од родителите и застапниците за правата на децата, кои одамна бараа заштита од штетните ефекти на социјалните медиуми.

Оваа забрана е кулминација на едногодишни шпекулации за тоа дали една држава ќе се осмели да ја ограничи технологијата која стана толку длабоко вградена во секојдневниот живот. Законодавците, фрустрирани од бавната реакција на технолошката индустрија на штетите, сега директно интервенираат.

„Иако Австралија е прва што усвои вакви ограничувања, малку е веројатно дека ќе биде последна“, предупреди Тама Ливер, професор по интернет студии на Универзитетот Кертин.

Владите од Данска до Малезија – па дури и некои држави во САД – веќе сигнализираат дека планираат слични мерки. Ова следи четири години откако протечените интерни документи на Meta (META.O) открија дека компанијата била свесна за врската помеѓу нејзините производи и проблеми со сликата за телото и суицидалните мисли кај тинејџерите.

„Забраната за социјални медиуми во Австралија… е во голема мера како рударскиот канар во јагленокопот“, додаде Ливер, сугерирајќи дека ова е почеток на успешна борба против моќта на „Големата Технологија“.

Обединетото Кралство, кое веќе ги принудува порнографските веб-страници да ги блокираат корисниците под 18 години, внимателно го следи австралискиот пристап кон старосните ограничувања. „Кога станува збор за безбедноста на децата, ништо не е исклучено“, порача портпарол на британската влада.

За да се оцени успехот, австралискиот регулатор задолжен за спроведување на забраната, Комесарот за е-безбедност, ангажираше Универзитетот Стенфорд и 11 академици да ги анализираат податоците за илјадници млади Австралијци опфатени со забраната во следните најмалку две години.

Со исклучок на $X$ на Илон Маск, сите платформи сигнализираа дека ќе се усогласат, но методите се контроверзни:

Проценка на возраста на корисникот преку анализа на неговата онлајн активност, проценка на возраста, Најчесто преку скенирање на селфи и идентификација со документи, Потврдување со прикачени лични документи или поврзани банкарски сметки.

Еден од најгласните противници е Илон Маск, кој остро ја осуди забраната, тврдејќи дека таа „изгледа како заден начин за контрола на пристапот до интернет од страна на сите Австралијци“.

Голем дел од платформите изразија слично незадоволство, предупредувајќи дека законот го нарушува правото на луѓето на слобода на говор. Како кулминација на тензиите, предизвикот пред Високиот суд на Австралија – поднесен од либертаријански државен законодавец – е веќе во тек, што укажува дека правната битка допрва ќе се разгорува.

За компаниите за социјални медиуми, овој закон означува влегување во нова ера на структурна стагнација. Истражувањата покажуваат дека бројот на корисници веќе се израмнува, а времето поминато на платформите се намалува.

Иако технолошките гиганти тврдат дека не остваруваат голем профит од реклами прикажани на лица под 16 години, тие алармираат: забраната го пресекува дотекот на идни корисници. Ова е особено значајно кога ќе се земе предвид фактот дека, непосредно пред стапувањето на сила, 86% од австралиските деца на возраст од 8 до 15 години користеле социјални медиуми.

„Деновите кога социјалните медиуми се гледаа како платформа за нескротливо самоизразување, мислам дека доаѓаат до крај“, изјави Тери Флу, ко-директор на Центарот за вештачка интелигенција, доверба и управување на Универзитетот во Сиднеј.

Иако платформите одговорија на регулаторните закани со воведување минимална возраст од 13 години и дополнителни безбедносни функции, Флу заклучува: „Ако тоа беше структурата на социјалните медиуми во периодот на бумот, не мислам дека би ја воделе оваа дебата“. Тоа сугерира дека индустријата едноставно не направила доволно за да избегне ваква драстична регулација.

Технологија

Google ја укинува омилената апликација – еве со што ќе биде заменета

Google ќе го укине Google Assistant на повеќето Android уреди почнувајќи од почетокот на следната година, како дел од планот за замена на гласовниот помошник со новата вештачка интелигенција Gemini.

Google Assistant, лансиран во 2016 како конкурент на Apple Siri и Amazon Alexa, ќе биде надграден со Gemini, кој ќе се користи и на таблети, автомобили, слушалки, часовници и паметни куќни уреди. Новиот систем ќе овозможува природно гласовно управување и исти команди како претходниот помошник.

Google исто така претстави Gemini Home AI за паметни куќни уреди, а новиот Google Home Speaker се очекува во пролет 2026. Google Assistant ќе остане активен до март 2026, по што корисниците ќе бидат целосно префрлени на Gemini.

Претходно услугата се викала Bard, но беше ребрендирана во Gemini почетокот на 2024, кој сега покрива и AI модели и домашни уреди.