„Пијалокот на боговите“: Јерба мате – чајот што го чува срцето и го буди телото
Јужноамериканскиот чај Јерба мате сѐ почесто го освојува светот со своите здравствени придобивки и ефекти слични на кафето – но без неговите несакани дејства. Овој древен напиток, познат и како „пијалок на боговите“, традиционално се користи во Аргентина, Бразил, Уругвај и Парагвај, каде што се смета за национално богатство. Европските доселеници уште го нарекле и „зеленото злато“.
Чајот се добива од листовите на истоимената билка која природно расте како грмушка или ниско дрво и содржи до 1,5% кофеин. За разлика од кафето, мате не предизвикува несоница, нервоза или други вообичаени нуспојави, а благодарение на богатството со витамини и минерали, го зајакнува телото и умот.
Шест причини зошто Јерба мате го заслужува вниманието:
1. Природен еликсир со богат состав
Мате содржи повеќе витамини и минерали дури и од зелениот чај – вклучително витамини A, C, E и B-комплекс, како и калциум, магнезиум, железо, калиум и антиоксиданси. Благодарение на ова, чајот го поддржува имунитетот, ја поттикнува циркулацијата и делува како природен енергетски засилувач.
2. Го зајакнува коскениот систем
Истражувањата покажуваат дека редовната консумација на Јерба мате може да ја зголеми густината на коските – дури и кај жени во постменопауза кои не се физички активни.
3. Потенцијален борец против рак на дебелото црево
Научни анализи укажуваат дека екстрактите од мате предизвикуваат самоуништување на клетките на рак на дебелото црево, благодарение на неговите антикарциногени компоненти.
4. Го штити срцето и крвните садови
Мате го регулира срцевиот ритам и крвниот притисок, го намалува воспалението и ги релаксира крвните садови, овозможувајќи подобра циркулација и заштита од срцеви заболувања.
5. Помага во борбата со стресот и заморот
Овој чај го намалува заморот, ја опушта мускулатурата и го освежува телото, а истовремено ја зголемува отпорноста на организмот кон настинки и хроничен умор.
6. Ја подобрува дигестијата и метаболизмот
Мате се користи за забрзување на варењето, го контролира апетитот и помага при слабеење. Делува и како благ чистач на организмот.
Како се подготвува?
Јерба мате има посебна култура на подготовка, слична на церемонијата на јапонскиот чај. Традицијата наложува само една личност да го приготвува чајот и да го нуди на останатите. Во Аргентина, овој пијалок го консумираат дури 92% од населението.
Со своите бројни својства и вековна традиција, Јерба мате е повеќе од чај – тој е симбол на здравје, енергија и заедништво.
