Балкан

Хрватска воведува задолжителен воен рок од почетокот на следната година

Хрватска го враќа задолжителниот воен рок од почетокот на 2026 година

Со најавените измени на Законот за одбрана и Законот за служба во вооружените сили, Хрватска од 1 јануари 2026 година повторно ќе воведе задолжителен воен рок, по пауза од речиси две децении. Предлогот, поднесен од Владата на премиерот Андреј Пленковиќ, веќе е во процедура пред хрватскиот парламент.

„Од 2008 година, воениот рок беше суспендиран. Сега, со внимателно прилагодена основна воена обука, сакаме да овозможиме на младите генерации да стекнат вештини кои недостигаа цели 17–18 генерации. Ова ќе ја засили и оперативната подготвеност на Хрватската војска“, изјави Пленковиќ.

Два месеца обука, финансиска поддршка и работен стаж

Воениот рок ќе трае два месеца и ќе се извршува во касарните во Книн, Слуњ и Пожега. Регрутите ќе добиваат месечна надомест од 1.100 евра, со покриени трошоци за храна, превоз и одмор. Овој период ќе се смета како работен стаж, а вработените регрути ќе уживаат заштита од отпуштање за време на обуката.

Регрутација и санкции

Сите хрватски државјани ќе се заведуваат во воена евиденција со навршување 18 години, а повикот за воена служба ќе следи во годината кога лицето полни 19 години. Максималната возраст за служење воен рок е 30 години. По добиениот повик, секој регрут мора да се јави на задолжителен лекарски преглед. Во спротивно, следува принудно приведување од страна на полицијата и парична казна од 250 до 1.320 евра.

Алтернатива за приговор на совест

Лицата кои поради лични или верски убедувања одбиваат воена служба, ќе имаат можност да служат цивилно – во Цивилна заштита при МВР или во јавни комунални претпријатија.

Обуката во Цивилна заштита ќе трае три месеци, додека ангажманот во противпожарни служби, одржување зеленило и улици – четири месеци, со работно време од осум часа дневно, пет дена во неделата.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.