Градоначалникот на Битола, Тони Коњановски, денес присуствуваше на официјалното отворање на новиот Ехо кабинет за колор дуплекс доплер на каротидни артерии во Хоспис Сју Рајдер Битола – прв од ваков вид во регионот што ќе работи на товар на Фондот за здравствено осигурување (ФЗО).
Оваа значајна дијагностичка метода овозможува навремено откривање и следење на промените на каротидните артерии, кои се директно поврзани со ризикот од мозочен удар и други сериозни васкуларни заболувања.
„Со отворањето на овој кабинет правиме голем чекор напред во раната дијагностика и превенција. Пациентите од Битолскиот регион добиваат навремена, бесплатна и квалитетна услуга“, изјави Коњановски.
На свеченоста присуствуваше и Прим. д-р Ленче Нелоска, директор на ЈЗУ Специјализирана болница за геријатриска и палијативна медицина „13 Ноември“, која ја потенцираше важноста на ваквите вложувања во здравствениот систем.
Новиот кабинет претставува дел од пошироките напори за унапредување на здравствената заштита во општина Битола и овозможува полесен пристап до специјализирани прегледи за сите граѓани.
