Според податоците на Центарот за управување со кризи, заклучно со утрово, 11 јули 2025 година до 07:30 часот, низ територијата на Република Северна Македонија се регистрирани вкупно 38 пожари на отворен простор. Од нив, седум се активни, четири се ставени под контрола, а 27 се целосно изгаснати.
Активни пожари:
Општина Чучер Сандево: шумски пожар помеѓу селата Блаце и Горњани, во месноста Рамна шума.
Општина Прилеп: приземен пожар во мешана шума кај селото Бешиште, месност Бешишки Рид.
Општина Македонски Брод (два пожара): помеѓу селата Црешнево и Локвица во деградирана дабова шума и грмушки; и кај село Крапа, во нискостеблеста шума.
Општина Дојран: пожар во нискостеблеста шума кај селото Николич.
Општина Чашка: чад на карпест терен под Солунска Глава, помеѓу Изворите на Бабуна и Бабина Дупка.
Општина Тетово: пожар на нива во близина на бензинска пумпа „Окта Петрол“.
Пожари под контрола:
Македонски Брод (три пожари): кај селата Рамне, Ковче и Слатина, со ниска и мешана вегетација.
Општина Делчево: пожар на градската депонија Острец.
Изгаснати пожари:
Поголемиот дел од изгаснатите пожари се забележани во скопскиот, источниот и полошкиот регион, а се работи за запалена сува трева, ниска вегетација, шумски појаси и депонии. Изгаснати се пожари во општините Шуто Оризари, Ѓорче Петров, Аеродром, Кисела Вода, Студеничани, Струмица, Василево, Велес, Кавадарци, Карбинци, Делчево, Кочани, Куманово, Крива Паланка, Желино, Тетово, Гостивар, Прилеп и Долнени.
Надлежните служби се на терен и продолжуваат со активности за целосно локализирање и гаснење на активните пожари.
