YouTube воведува големи промени: Се укинува популарната опција

YouTube укинува позната функција – доаѓа нов систем за следење на популарни видеа

Платформата YouTube најави значајна промена во начинот на кој корисниците ќе следат што е актуелно на нејзината мрежа. Популарната секција „Trending“ (во тренд), како и листата „Trending Now“, кои беа дел од платформата од 2015 година, ќе бидат укинати до крајот на јули 2025 година.

Нивната улога ќе ја преземе новата функција YouTube Charts – систем кој ќе прикажува најгледани содржини по категории, како што се музички видеа, подкасти, трејлери за филмови и други теми, кои постепено ќе се прошируваат.

Содржините поврзани со видео игри ќе останат достапни преку страницата Gaming Explore.

Од YouTube објаснуваат дека начинот на кој гледачите откриваат популарни видеа драстично се променил во последните години. Наместо да ја посетуваат секцијата „Trending“, сè повеќе корисници следат видеа преку Shorts, алгоритамски препораки, како и преку други социјални мрежи – особено TikTok.

Исто така, креаторите на содржини долго време ја критикуваа „Trending“ листата, тврдејќи дека таа несразмерно ги фаворизира големите брендови и официјални канали, оставајќи ги независните автори во втор план.

Во обид да се зголеми видливоста на нови и разновидни видеа, YouTube претстави неколку нови алатки:

Inspiration Tab – функција базирана на вештачка интелигенција, која им нуди идеи на креаторите врз основа на актуелните интереси на гледачите.

Hype – експериментална функција што им овозможува на корисниците да поддржат видеа кои, со доволна поддршка, може да се појават на проширената трендинг листа.

Новата функционалност YouTube Charts веќе е достапна во некои земји, а целосното укинување на постојната Trending страница ќе се реализира до крајот на јули 2025 година.