Зеленски има огромна причина за славење! Ова се најдобрите вести за Украина од почетокот на војната

На конференцијата во Рим за Украина ветени над 10 милијарди евра помош

На Меѓународната конференција за економско закрепнување на Украина, што се одржа во Рим, учесниците ветија над 10 милијарди евра финансиска помош за поддршка на земјата погодена од војната. Информацијата ја соопшти италијанската премиерка Џорџа Мелони, која беше домаќин на настанот, заедно со украинскиот претседател Володимир Зеленски.

Конференцијата се одржа во сенка на засилените руски напади со дронови и ракети врз Киев, за кои Зеленски, обраќајќи се на отворањето, изјави дека претставуваат „чист тероризам“.

„Русија мора да се соочи со построги санкции за да се засили притисокот за запирање на агресијата врз Украина“, изјави Мелони на заедничката прес-конференција со Зеленски.

„Нашата определба е јасна – да продолжиме со поддршката за Украина, а истовремено да го задржиме, па дури и да го зголемиме притисокот врз Русија, пред сè преку санкции“, нагласи италијанската премиерка.

Мелони и германскиот канцелар Фридрих Мерц ја истакнаа историската паралела со обновата на нивните земји по Втората светска војна, како пример за она што може да го постигне и Украина.

„Сите денес можеме да бидеме горди на резултатите што ги постигнавме – како држави, меѓународни организации, финансиски институции, локални власти, бизнис секторот и граѓанското општество“, рече Мелони на отворањето на конференцијата. „Заеднички, ветивме повеќе од 10 милијарди евра“, додаде таа.

Ова е четврта ваква конференција откако Русија ја започна инвазијата врз Украина во февруари 2022 година. Европската комисија најави дека ќе додели 2,3 милијарди евра за обнова на земјата.

Претседателката на Европската комисија, Урсула фон дер Лајен, изјави дека преку веќе потпишани обврски во вредност од 2,3 милијарди евра, се очекува да се мобилизираат до 10 милијарди евра инвестиции за обнова на домови, повторно отворање болници, оживување на бизнисите и обезбедување енергетска стабилност.

„Ние дословно инвестираме во иднината на Украина“, порача фон дер Лајен.