Со гала концерт на американската пијанистка Клер Хуангчи и Македонската филхармонија под водство на маестро Едвин Оутвотер, на Античкиот театар во Охрид вечерва свечено беше отворено 65. издание на најреномираниот музичко-сценски фестивал во земјава – „Охридско лето“. Фестивалот ќе трае до 20 август и ќе донесе повеќе од 40 дена врвна уметност, музика, театар и креативен дијалог од целиот свет.
Свеченото отворање го прогласи покровителката на фестивалот, претседателката Гордана Сиљановска – Давкова, која во своето обраќање го истакна вековното културно наследство на Охрид како непроценлив контекст во кој „Охридско лето“ ја гради својата вечност. „Охрид е град на вековни дијалози… Уметноста овде не е привремена, туку безвременска“, порача таа, повикувајќи ги присутните да ги отворат срцата за уметноста што „не заробува, туку преобразува“.
Министерот за култура и туризам, Зоран Љутков, нагласи дека фестивалот не е само програма, туку духовен завет, трајна врска меѓу културното минато и европската иднина. „Овде уметноста не се изведува – таа се случува, се памети и се вградува во нашата колективна културна меморија“, рече Љутков, подвлекувајќи ја потребата од постојано културно осознавање.
Во името на уметниците, своја порака упати актерот Ѓорѓи Јолевски, кој со длабока емотивна интонација ја нагласи улогата на уметноста како чин на отпор и надеж. „Во време на војни и реторика без катарза, уметноста не е луксуз – таа е нужност… Секој чин на уметност е чин на надеж“, рече Јолевски.
Во рамки на фестивалот, над 500 уметници од дваесетина земји ќе настапат на неколку сцени низ Охрид, претворајќи го градот во светска уметничка метропола. Во фокусот ќе бидат врвни музички и театарски изведби, но и спојот на современото со традиционалното, домашното со интернационалното.
Основано во 1961 година со концертот на Ана Липша – Тофовиќ, „Охридско лето“ израсна во престижен фестивал и дел од Европската Асоцијација на Фестивали од 1994 година. Денес претставува клучна културна придобивка за Македонија и Охрид, кој во текот на летото станува отворена сцена за светската уметност.
„Охридско лето“ е не само традиција, туку и силна потврда дека уметноста – и по 65 години – останува највисоката форма на човечка надеж, стремеж и убавина.
