Американскиот претседател Доналд Трамп потврди дека САД ќе испратат нови пратки оружје во Украина, вклучувајќи и напредни системи за воздушна одбрана „Патриот“, кои ќе бидат дистрибуирани преку НАТО. Според него, алијансата ќе ги финансира трошоците и ќе ги прераспредели системите меѓу земјите членки.
„Ќе ги испратиме ракетите „Патриот“ во НАТО, а потоа НАТО ќе ги прераспредели. НАТО ќе ја рефундира цената“, изјави Трамп за NBC News, што претставува значаен пресврт од неговата претходна политика на ограничена американска помош за Украина.
Одлуката следува по „позитивниот дијалог“ што украинскиот претседател Володимир Зеленски го водел со Трамп, истакнувајќи ја итната потреба за зајакнување на украинската воздушна одбрана. Зеленски побара десет системи „Патриот“, а Германија и Норвешка веќе понудија финансиска поддршка за неколку од нив. Според Зеленски, „патриотите се вистински заштитници на животот“ во услови на зголемени руски напади.
Системот „Патриот“ претставува врвна технологија за одбрана од балистички и крстосувачки ракети и авиони, со висока прецизност и способност за пресретнување закани во реално време. Токму поради тоа, Украина инсистира на нивна поголема присутност во својата одбрана.
Министерот за надворешни работи на САД, Марко Рубио, потврди дека во процесот на испорака клучна улога ќе имаат европските членки на НАТО. Тој ги повика земјите кои веќе располагаат со системи „Патриот“ да ги отстапат на Украина, додека САД ќе помогнат со набавка на нови.
„Мораме да им испратиме оружје… Сега тие се силно нападнати“, изјави Трамп, признавајќи ја тежината на актуелните руски напади, по рекордниот воздушен удар врз Украина со 728 дронови во еден ден. Зеленски предупреди дека Москва планира да ја зголеми оваа бројка на 1.000.
Минатата недела, Пентагон привремено ја суспендираше испораката на дел од оружјето, што предизвика загриженост во Киев. Според ОН, јуни беше најсмртоносниот месец за украинските цивили од почетокот на војната.
Трамп, иако досега настојуваше да го намали американското учество, сега се залага за поголема вклученост на европските партнери и поголема рамнотежа во финансирањето. Од 2022 до крајот на 2024 година, САД ѝ доделија на Украина помош во вредност од 69 милијарди долари, но Трамп инсистира дека Европа мора да преземе поголем дел од товарот.
Во меѓувреме, Трамп најави дека во понеделник ќе даде „голема објава“ поврзана со Русија, откако изрази разочарување од неодамнешниот разговор со рускиот претседател Владимир Путин. Американскиот државен секретар Рубио исто така откри дека во Малезија разговарал со рускиот министер Сергеј Лавров, при што, како што вели, размениле нови идеи за можен крај на војната во Украина.
