Aл Џезира Балканс ја емитуваше последната емисија, вака водителката се прости од гледачите [ВИДЕО]

Регионалната телевизиска мрежа Ал Џезира Балканс (АЏБ) во саботата ја емитуваше својата последна самостојна емисија, а целосното затворање на програмата ќе се случи до крајот на јули. Во завршниот говор, водителката Далија Хасанбеговиќ им се заблагодари на гледачите за речиси 14 години доверба и најави дека до затворањето ќе се емитуваат само репризи.

Ал Џезира Балканс функционираше од 2011 година и опфаќаше студија во Сараево, Загреб, Белград, Подгорица и Приштина. Околу 200 вработени се известени за затворањето во последен момент, а причините не се јавно соопштени. Според шпекулации, седиштето во Доха е незадоволно од финансиските резултати.

Здружението на новинари од Босна и Херцеговина ја изрази загриженоста поради одлуката и побара од раководството да ги објасни причините и да го спроведе раскинувањето на договорите согласно законите. Хрватските новинарски организации оценија дека затворањето е сериозен удар врз медиумскиот плурализам и слободата на говорот во регионот.

Тие потенцираат дека АЏБ беше ретка платформа за квалитетни, независни и проверени информации, кои опфаќаа важни теми како корупција, злоупотреба на моќ и социјална неправда. Затворањето на мрежата го сметаат за „демократска загуба“ и предупредуваат дека недостатокот на заштита за новинарите претставува директна закана за демократијата.

Новинарските организации ги повикаа националните влади, институциите на ЕУ и други актери да преземат конкретни мерки за заштита на медиумскиот плурализам, вклучително и формирање фондови за поддршка на новинарите и зголемување на транспарентноста во медиумската сопственост и финансирање.

Al Jazeera Balkans je upravo emitovala svoje posljednje vijesti. Prezenterka Dalija Hasanbegović Konaković je zahvalila gledateljima na povjerenju ukazanom svih ovih godina otkako postoji AJB. pic.twitter.com/YbhNHn0UrE

— Faktor.ba (@faktorba) July 12, 2025