Република

Ребалансот изгласан: Коњановски најавува ново училиште, сали, игралишта и паркинзи во Битола

Советот на Општина Битола го изгласа ребалансот на буџетот, со што се отвора пат за серија капитални инвестиции во образованието, спортот, урбаниот развој и квалитетот на живот на граѓаните.

Градоначалникот Тони Коњановски упати јавна благодарност до советниците кои го поддржаа ребалансот и најави дека следуваат конкретни проекти со вкупна вредност од неколку стотици милиони денари.

Во образованието и спортот, ќе се изградат три нови спортски сали во основните училишта „Стив Наумов“, „Тодор Ангелевски“ и подрачното училиште во Долно Оризари, со вредност од 144 милиони денари.

Дополнително, ќе се реконструираат или изградат девет училишни игралишта во различни училишта низ градот, за што се издвоени 112 милиони денари, како и две јавни игралишта во населбите Стрелиште и Брусничка, со вредност од 28 милиони денари.

Во делот на урбаниот развој, се предвидува изградба на шест нови паркинзи на повеќе локации, што ќе овозможи над 150 нови паркинг места, со инвестиција од 30 милиони денари.

Буџетот предвидува и пренамена на постоечки објект во Буковски ливади во основно училиште (30 милиони денари), како и изградба на нова атлетска патека на стадионот „Петар Милошевски“ во вредност од 77 милиони денари.

„Инвестициите не смеат и нема да застанат. Битола оди напред“, порача Коњановски.

Република

Утре дел од Тетово и три тетовски села без електрична енергија

Поради планирани работи на електродистрибутивната мрежа, утре (16 декември 2025 година) без електрична енергија ќе останат делови од Тетово и три тетовски села.

Во периодот од 09:00 до 14:30 часот струја ќе немаат делови од селата Долно Палчиште и Мала Речица, додека во селото Камењане прекинот ќе трае од 09:00 до 14:00 часот.

Во град Тетово, планиран прекин на електричната енергија ќе има од 12:30 до 14:30 часот, и тоа кај објектите што се наоѓаат во близина на Стариот технички факултет.

Од надлежните информираат дека прекините се поради редовно одржување на мрежата и апелираат на разбирање од граѓаните.

Република

Проданоски: Празнична бајка на плоштадот „Методија Андонов – Ченто“

На плоштадот „Методија Андонов – Ченто“ во Прилеп денеска се одржа германски Божиќен базар, кој во празнична атмосфера обедини ученици, наставници, граѓани и гости од повеќе општини низ државата. Настанот беше исполнет со божиќни колачиња и переци, рачно изработени празнични украси, песни на германски јазик и креативни изведби на младите учесници.

Германскиот Божиќен базар беше организиран од Здружението на наставници по германски јазик, со поддршка од Гете-институтот од Скопје, Амбасадата на Сојузна Република Германија во Македонија и Општина Прилеп. Голем интерес предизвика активното учество на ученици од основните и средните училишта во Прилеп, кои преку својата креативност придонесоа за автентична празнична атмосфера.

На настанот присуствуваше и амбасадорката на Сојузна Република Германија, Петра Дрекслер, што, според Проданоски, претставува значајна поддршка и потврда за важноста на ваквите културно-образовни иницијативи.

Проданоски истакна дека ваквите настани им овозможуваат на младите да се запознаат со други култури и традиции, да развиваат почит, толеранција и отвореност кон различностите – вредности кои се основа на современо и европско општество. Тој нагласи дека Прилеп уште еднаш се покажа како град кој ги негува културните настани, ги поддржува младите и живее со празничниот дух.

Упатени беа честитки до организаторите и благодарност до сите деца и млади учесници, кои со својот труд и ентузијазам го направија настанот посебен.

Република

Инвестиција на Министерството за спорт – Тетово доби современо уреден простор за спорт и рекреација

Министерот за спорт Борко Ристовски, заедно со градоначалникот на Општина Тетово, Биљал Касами, денеска официјално го пуштија во употреба реконструираниот спортски центар „Блок 70“, кој претставува современо уреден простор наменет за спорт, рекреација и унапредување на здравите животни навики.

Со оваа инвестиција, локалното население, а особено младата популација, добива комплетно уреден спортски комплекс кој опфаќа детско игралиште, фудбалско игралиште, кошаркарско игралиште со полипропиленски под, како и фитнес зона опремена со современи реквизити.

Реконструкцијата на спортскиот центар „Блок 70“ е уште еден успешно реализиран проект на Министерството за спорт, во рамки на програмата за изградба и обнова на спортската инфраструктура низ целата држава, со цел создавање квалитетни и достапни услови за спорт и рекреација за сите граѓани.

Министерството за спорт и понатаму останува посветено на вложувања во спортската инфраструктура во сите општини во државата, со јасна заложба спортот да биде достапен за сите, во секој град и во секоја населба.