Шведската влада денеска соопшти дека активно разгледува можност за зголемување на старосната граница за повикување на поранешни воени офицери во активна служба – од сегашните 47 на 70 години – како дел од поширока стратегија за зголемување на одбранбените капацитети на земјата во услови на можна криза или конфликт.
Овој предлог произлегува од истрага нарачана од владата во 2024 година, кога Шведска стана полноправна членка на НАТО. Истражувањето имаше за цел да утврди како земјата може подобро да ги мобилизира и пополни редовите на вооружените сили во време на закана.
– Шведска, со население од 10,5 милиони жители, поминува низ сериозен период. Инвестираме многу во нашата воена одбрана, но тоа мора да биде проследено и со соодветен број достапен персонал, изјави министерот за одбрана Пал Јонсон.
Шведска го напушти своето долготрајно воено неврзување во 2022 година, по руската инвазија врз Украина, и од тогаш вложува значителни напори во модернизација и проширување на своите одбранбени капацитети како нов член на Атлантскиот сојуз.
Зголемувањето на старосната граница за враќање на поранешни офицери во активна служба е една од предложените мерки за справување со предизвиците поврзани со персоналот во армијата и обезбедување резервни сили во услови на криза.
