Република

Владата одобри 707 милиони денари за Битола – Коњановски најави голем инвестициски бран

На денешната седница на Советот на Општина Битола, градоначалникот Тони Коњановски го претстави ребалансот на буџетот за 2025 година, кој го нарече „историски ден за Битола“. Главна причина за ребалансот се 707 милиони денари што општината ги добила од Владата на Република Македонија како поддршка за проектите поднесени на последниот владин повик.

„Никогаш досега една Влада не одвоила толкави средства за Битола“, изјави Коњановски, кој побара поддршка од советниците за реализација на проекти од витално значење.

Ребалансот опфаќа голем број капитални инвестиции, меѓу кои:
• изградба на три нови спортски сали во основни училишта,
• реконструкција на девет училишни спортски игралишта,
• шест нови паркинзи со преку 150 паркинг-места,
• изградба на атлетска патека на стадионот „Петар Милошевски“,
• обнова и изградба на десетици улици низ градот и населените места,
• инвестирање во образованието, старскиот дом, противпожарната единица, Зоолошката градина и ЈП Пазари.

Особен акцент беше ставен на проектите кои се дел од поддршката на Владата и Европската инвестициона банка преку Министерството за животна средина. Градоначалникот ги повика советниците конечно да ги изгласаат одлуките за грант-средствата, кои неколкупати не добиваа поддршка. „Ние како општина ништо не финансираме, добиваме грант кој нема да го враќаме, освен ако не се однесуваме неодговорно“, порача Коњановски.

На дневен ред беше и усвојувањето на нацрт-ДУП за Запад 08.01, со кој се предвидува изградба на нов спортски комплекс во Нова Битола со капацитет од 5.000 гледачи, како и основно училиште, детска градинка, старски дом, колективно домување и голема површина на парково зеленило. „Битола сака спорт“, истакна градоначалникот, додавајќи дека со новиот ДУП се предвидува и развој на сообраќајна мрежа и проширување на урбаното јадро на градот.

Дополнително, беше најавена и изградба на нов систем за водоснабдување со замена на потисниот цевковод со нова цевка Ф800, во должина од 2.6 километри. Целта е стабилизирање на водоснабдувањето за Битола, Новаци и Могила.

„Битола станува велоград“, рече Коњановски, најавувајќи нови велосипедски патеки, уредување на тротоари и поврзување на булеварите во Нова Битола.

Градоначалникот порача дека финансиската кондиција на Општината е стабилна, сите обврски се подмирени до 30 јуни 2025 година, а реализацијата на буџетот надминува 40% во вториот квартал. Со ова, според него, Битола е подготвена за нов инвестиционен циклус.

Република

Три децении пријателство: Македонија слави 30 години дипломатски врски со 14 земји

Во свечена атмосфера во Министерството за надворешни работи и надворешна трговија, денес беа одбележани три децении од воспоставувањето на дипломатските односи на Република Македонија со 14 земји, меѓу кои Соединетите Американски Држави, Грција, Австралија, Саудиска Арабија, Романија, Молдавија, Индија, Естонија, Украина, Казахстан, Монголија, Азербејџан, Литванија и Израел.

Свои обраќања на настанот имаа заменик-министерот за надворешни работи и надворешна трговија, Зоран Димитровски, како и амбасадорката на Романија, Адела Моника Аксинте.

Во своето обраќање, заменик министерот Димитровски истакна дека денес се слави „триесетгодишно патување на просперитет и взаемно почитување“ кое започнало во 1995 година. „Во тие рани години на нашата независност, секое воспоставување на дипломатски односи беше вистински камен-темелник во градењето на нашата државност. Тие први чекори го одбележаа нашиот непоколеблив пат кон западноевропските вредности и нашите аспирации за интеграција во евроатлантското семејство“, нагласи Димитровски.

Свечениот настан беше прилика да се потсети на значењето на долгорочната соработка и пријателството меѓу Република Македонија и земјите партнери, како и на заедничките вредности кои ги градат меѓусебните односи во изминатите три децении.

Република

Битола во празничен ритам: започнува најголемиот зимски фестивал во државата

Прочитајте ги секојдневните програмски содржини на фотографиите или разгледајте ја Програмата на „Зимска приказна“ на следниот линк:
https://www.bitola.gov.mk/zimska-prikazna-25-26/

Од 20 декември до 5 јануари, не пропуштајте да бидете дел од „Зимска приказна“.

Многу музика, детска програма, кино на отворено, возот „Мечо“, празничниот автобус и уште многу други содржини за сите генерации.

Годинава, бројките ја потврдуваат приказната:
-над 200 часа програма низ целиот град
-од нив, околу 35 часа детска програма
-67 бендови
-повеќе од 20 соло изведувачи
-5 фолклорни друштва
-2 градинки и 11 училишта како активен дел од програмата

Ова е најголемиот зимски фестивал во Македонија веќе неколку години.
Ова е декемврискиот ритам на Битола.

Република

ВЛЕН: Волјата на граѓаните ќе се потврди на изборите во Гостивар и Врапчиште

Коалицијата ВЛЕН најави силен настап на претстојните локални избори што ќе се одржат на 11 јануари, со јасна стратегија и поддршка за кандидати кои, како што велат од коалицијата, ја претставуваат волјата на граѓаните.

Во Општина Гостивар, ВЛЕН ќе настапи со реден број 1 на гласачкото ливче, предводена од кандидатот за градоначалник Невзат Бејта. Во Врапчиште, пак, коалицијата ја поддржува независната кандидатура на Зулхајрат Демири, кој се наоѓа под реден број 5.

Од ВЛЕН посочуваат дека симболиката на броевите 1 и 5 е во духот на слоганот „Еден глас“, кој ја отсликува нивната политика заснована на одлуки што произлегуваат директно од граѓаните.

Коалицијата потсетува дека веќе остварила победа во 10 општини, што, според нив, претставува јасен сигнал дека албанските гласачи ја отфрлиле, како што ја нарекуваат, политичката манипулација позната како „референдум“. ВЛЕН оценува дека ова е доказ за промената што ја бараат граѓаните и за слабеењето на политичките структури кои, според нив, денес формално опстојуваат само во Гостивар и Врапчиште.

„11 јануари е датум кога оваа волја повторно ќе се потврди“, порачуваат од коалицијата, повикувајќи ги граѓаните на Гостивар и Врапчиште да се обединат и да гласаат – број 1 во Гостивар и број 5 во Врапчиште – за, како што наведуваат, победа и власт што работи во интерес на народот.