Поради драстичен пораст на бројот на тешки повреди кај деца предизвикани од паѓање со електрични тротинети, Клиниката за детски болести во Загреб одржа вонредна прес-конференција, со поддршка од три министерства. Лекарите алармираа на петкратно зголемување на тешките повреди на мозокот и речиси тројно зголемување на хоспитализации во однос на минатата година.
Особено загрижува фактот што речиси половина од повредените деца воопшто не смееле да управуваат со тротинет според важечките закони, според кои минималната возраст е 14 години.
Според д-р Рок Кралј, специјалист по детска хирургија, во првата половина од 2025 година е забележан пораст на хоспитализации за 285%, а вкупното времетраење на болничкиот престој е зголемено за 143%, што укажува на се потешки повреди. Најчеста тешка повреда е епидурален хематом – состојба што може да доведе до сериозни невролошки оштетувања и дури до смртен исход.
„Сè уште немаме фатални случаи, но стравуваме дека тоа ќе се случи ако не се преземат мерки“, предупреди д-р Мирослав Ѓурашин, неурохирург и раководител на Референтниот центар за трауматизам кај деца.
Присутните претставници од полицијата и ресорните министерства истакнаа дека електричните тротинети не смеат да имаат сила поголема од 0,6 kW и да надминуваат брзина од 25 km/h. Побараа поголема одговорност од родителите, почитување на законските ограничувања и развој на култура на носење заштитна опрема, особено кациги.
Министерството за транспорт најави дека се разгледуваат дополнителни законски измени за регулирање на користењето на овие возила кај малолетници. Од Министерството за здравство апелираа родителите да не ги изложуваат децата на непотребни ризици и да ги охрабруваат на безбедни и соодветни активности.
