Основниот кривичен суд Скопје денеска донесе одлука за замена на мерката куќен притвор со ефективен затворски притвор за лицето С.Љ., осомничен за нападот врз градоначалничката на Скопје, Данела Арсовска.
Како што соопшти судот, првично осомничениот беше во куќен притвор, но по нова оценка на околностите, утврдено е дека постои опасност од бегство и можност за повторување на делото, согласно член 470 став 1 точки 1 и 2 од Законот за кривична постапка. Поради тоа, во скратена постапка му е определен притвор.
По доставување на решението, од надлежната полициска станица е потврдено дека С.Љ. е веќе спроведен во затворот „Скопје“.
Инцидентот се случи на 12 јули 2025 година, кога градоначалничката Арсовска беше физички нападната со тупаници за време на увид на дивоградба на Бит Пазар. Настанот предизвика силна јавна осуда и реакции во институциите и јавноста.
