Кинеската економија расте побрзо од очекуваното, и покрај притисоците од американските царини
Кинеската економија во вториот квартал од 2025 година забележа раст што ги надмина очекувањата на аналитичарите, зацврстувајќи ја позицијата на земјата да ја исполни проектираната годишна цел за раст од 5% и намалувајќи ја потребата за дополнителни економски стимулации од страна на државата.
Според податоците објавени од Националното биро за статистика на Кина, бруто-домашниот производ (БДП) пораснал за 5,2% во вториот квартал, надминувајќи ја прогнозата од 5,1% дадена во анкетата на „Ројтерс“.
Сепак, некои сегменти од економијата покажуваат знаци на забавување. Малопродажбата во јуни пораснала за 4,8% на годишно ниво, што претставува успорување, додека продажбата на угостителски услуги – вклучувајќи храна и пијалаци – бележи скромен раст од само 0,9%, најслаб резултат од декември 2022 година.
Од друга страна, индустриското производство бележи солиден напредок, со раст од 6,8%, што е над очекуваните 5,7%.
Секторот за недвижности продолжува да се соочува со предизвици – инвестициите во овој сегмент паднале за 11,2% во првите шест месеци од годината, што е дополнително влошување во споредба со падот од 10,7% забележан до мај. И инвестициите во инфраструктурата и производството покажуваат забавување.
„Пазарот на недвижности и натаму е во процес на достигнување на дното“, изјави Лајјун Шенг, заменик-комесар на Националното биро, на прес-конференција по објавувањето на податоците.
Шенг додаде дека домашната потрошувачка учествувала со 52% во БДП во првата половина од годината, со зголемен удел во вториот квартал, додека трговијата забележала пад во својот придонес.
Овие показатели ја задржуваат Кина на стабилен економски курс, и покрај глобалната неизвесност и зголемените трговски тензии со САД.
