Силни бури и поплави го парализираа североистокот на САД – Њу Џерси прогласи вонредна состојба
Невремето кое го зафати североисточниот дел на САД предизвика сериозни поплави низ Њујорк, додека во соседната држава Њу Џерси беше прогласена вонредна состојба поради обилните врнежи и зголемениот ризик од дополнителни поплави.
Сите пет општини на Њујорк се под предупредување за поплави од синоќа, а градските власти ги повикаа граѓаните да избегнуваат подруми и ниски зони, кои претставуваат најголем ризик. На социјалните мрежи кружат снимки на кои се гледаат поплавени метро-станици, автомобили заглавени во вода и силни водени струи кои се слеваат по скалите и пероните.
Гувернерот на Њу Џерси, Фил Марфи, ја прогласи вонредната состојба, апелирајќи до жителите да останат во своите домови и да го одложат патувањето. „Поради обилните врнежи и потенцијалот за поплави, ги повикуваме сите на максимална претпазливост“, напиша Марфи на платформата X.
Невремето силно го погоди и воздушниот сообраќај. Привремени прекини на летови беа воведени на најмалку шест големи аеродроми на Источниот брег, вклучувајќи ги ЏФК и Ла Гвардија во Њујорк, како и Њуарк Либерти во Њу Џерси. Одлуката за приземјување на летовите предизвика неколкучасовни доцнења и пренасочувања, со слична состојба и на аеродромите во Филаделфија, Балтимор и Вашингтон.
Според податоците на Националната метеоролошка служба, во одредени делови од Њујорк за кратко време наврнаа меѓу 50 и 75 милиметри дожд.
Иако во доцните вечерни часови врнежите се преместија кон исток и изгубија интензитет, метеоролозите предупредуваат дека нов бран нестабилно време е можен веќе денес. Се очекува комбинација од силен дожд, екстремно високи температури и висока влажност на воздухот. Според прогнозите, термометрите би можеле да покажат над 38 степени Целзиусови.
Аеродромите и понатаму се соочуваат со голем број доцнења и откажани летови, при што патниците пријавуваат неколкучасовни чекања, пренасочувања и хаос во организацијата на патувањата.
