Две малолетни девојчиња од Тетово завршија во несвест и беа хоспитализирани откако наводно купиле алкохолни пијалоци од вработена во тобако, и ги консумирале на базен, соопшти СВР Тетово.
Настанот се случил на 14 јули околу 10 часот, а полицијата била известена истиот ден во 18:00 часот од Џ.Н. (54) од Тетово, татко на едно од девојчињата. Според пријавата, неговата малолетна ќерка купила две шишиња алкохол од трафика и заедно со нејзините другарки заминале на базен. Таму, по консумирање на пијалокот, две од нив изгубиле свест и биле итно пренесени во Клиничката болница во Тетово, каде им била укажана медицинска помош.
Случајот е пријавен како кривично дело „точење на алкохолни пијалоци на малолетни лица“ по член 204 од Кривичниот законик. Полицијата презема мерки за целосно расчистување и документирање на инцидентот.
